(ශ්‍රීනාත් ප්‍රසන්න ජයසූරිය සහ ගයාන් සූරියආරච්චි)

රහස් පොලිස් නිලධාරීන් ලෙස පෙනී සිටිමින් පුද්ගලයකුගෙන් කෝටි හතරක මුදලක් අල්ලස් වශයෙන් ඉල්ලා එයින් රුපියල් කෝටියක මුදලක් අල්ලස් වශයෙන් ලබාගත් බව කියන කාන්තාවක ඇතුළු සිවුදෙනකු කොල්ලුපිටිය ප්‍රදේශයේ බැංකුවක් අසලදී  වැටලීමක් කර අත්අඩංගුවට ගත් බව අල්ලස් හෝ දූෂණ චෝදනා විමර්ශන කොමිෂන් සභාව පවසයි.

අත්අඩංගුවට ගැනුණු කාන්තාව කඩවත ප්‍රදේශයේ පදිංචිකාරිනියක වන අතර අනෙක් තිදෙනා දෙමඩගොඩ කොළඹ 12 විල්සන් මාවතේ සහ දෙමටගොඩ ප්‍රදේශයේ පදිංචිකරුවෝ වෙති.

රහස් පොලිස් නිලධාරිනියක සහ නිලධාරින් ලෙස පෙනී සිටි සිවු දෙනකු මීට දින කිහිපයකට ඉහතදී කොල්ලුපිටිය ප්‍රදේශයේ නිවෙසක තිබූ එක්කෝටි විසි ලක්ෂයක මුදලක් සහ ඇමෙරිකන් ඩොලර් 3500ක් නීති විරෝධී ලෙස උපයා ගත් බව කියමින් ඔවුන්ගේ බාරයට ගෙන රැගෙන ගොස් ඇත.

මීට අමතරව එම නිවෙසේ සිටි ඉන්දියන් ජාතිකයකු සතු විදෙස් ගමන් බලපත්‍රය ද රහස් පොලිස් නිලධාරීන් ලෙස පෙනී සිටි මෙම අය විසින් රැගෙන ගොස් ඇතැයි අල්ලස් හෝ දූෂණ විමර්ශන චෝදනා කොමිසමේ උසස් නිලධාරියෙක් පැවැසීය.

ඊට විරුද්ධව ක්‍රියාමාර්ග නොගෙන උදව් කිරීම සඳහා රුපියල් කෝටි හතරක අල්ලස් මුදලක් පැමිණිලිකරුගෙන් ඉල්ලා ඇත.

එම මුදල කෝටි තුනහමාරක් දක්වා අඩු කරගෙන එම මුදලින් රුපියල් කෝටියක මුදලක් කොල්ලුපිටිය ප්‍රදේශයේ බැංකුවක් අසලදී එම ව්‍යාපාරිකයාගෙන් ලබාගත් බව කියන අවස්ථාවේ වැටලීමක් සිදු කර මෙම සිව් දෙනා අත්අඩංගුවට ගත් බව කොමිසම පවසයි.