(යොහාන් භාසුර)

‘සිපෙට්කෝ’ පිරවුම්හල්වලින් පරිහණය ගාස්තු ලෙස අය කළ බද්ද නැවත බැර කිරීම නිසා ඉන්ධන තොග ඇනවුම් කිරීම නැවත ආරම්භ කළ බව ඛනිජ තෙල් බෙදුම්කරුවන්ගේ සංගමයේ සම ලේකම් කපිල නාඔටුන්න මහතා අද (4) පස්වරුවේ පැවසීය.

ඉන්ධන පිරවුම්හල් තොග ඇනවුම් සඳහා ඊයේ (3) බැර කළ මුදල්වලින් බද්දක් සඳහා මුදල් කපාගැනීම නිසා ඊයේ දිනය සඳහා කර තිබූ ඇනවුම් අවලංගු කළ බවත් කපාගත් මුදල් අද පස්වරුව වන විට පිරවුම්හල්වල ගිණුම්වලට නැවත බැර කර තිබූ බවත් නාඔටුන්න මහතා කීය.

ඉන්ධන තොග හෙට දිනයේ ලැබෙන පරිදි බෙදාහැරීමට සූදානමින් සිටින බව ද ඒ මහතා වැඩි දුරටත් සඳහන් කළේය.

ඛනිජ තෙල් බෙදුම්කරුවන්ගේ වර්ජනය හේතුවෙන් පිරවුම්හල් රැසක අද දිනයේ ඉන්ධන නොතිබුණි.