ශ්‍රී ලංකාවේදී මේ මස 18 වැනිදා ආරම්භ වන සිවුවැනි විස්සයි-20 ලෝක කුසලාන ක‍්‍රිකට් තරගාවලියට සහභාගි වන ශ්‍රී ලංකා පිල බටහිර ඉන්දීය කොදෙව් පිලට සහ ඉන්දීය පිලට එරෙහිව පුහුණු තරග දෙකකට සහභාගිවීමට නියමිතය. ශ්‍රී ලංකාව සහ බටහිර ඉන්දීය කොදෙව් අතර පෙරහුරු තරගය මේ මස 13 වැනිදා පෙරවරු 9.30 සිට කොළඹ එන්. සී. සී. ක‍්‍රීඩාංගණයේදී ද, ශ්‍රී ලංකාව සහ ඉන්දියාව අතර පෙරහුරු  තරගය මේ මස 15 වැනිදා පෙරවරු 9.30 සිට කොළඹ පී. සරවනමුත්තු ක‍්‍රීඩාංගණයේදී ද, පැවැත්වීමට නියමිතය. ලෝක කුසලාන තරගාවලියේ ශ්‍රී ලංකාව සහභාගි වන පළමු තරගය සිම්බාබ්වේ පිලට එරෙහිව මේ මස 18 වැනිදා පස්වරු 7.30 ට සූරියවැව මහින්ද රාජපක්‍ෂ ජාත්‍යන්තර ක‍්‍රිකට් ක‍්‍රීඩාගංණයේදී පැවැත්වේ. ගාල්ල ජාත්‍යන්තර ක‍්‍රීඩාංගණයේදී මේ මස 26 වැනිදා ආරම්භ වන කාන්තා විස්සයි-20 ලෝක කුසලාන තරගාවලියට සහභාගි වන ලංකා කාන්තා පිල සහ පාකිස්තානු පිල අතර පුහුණු තරගය මේ මස 22 වැනිදා එන්. සී. සී. ක‍්‍රීඩාංගණයේදී පැවැත්වේ. විස්සයි-20 ලෝක කුසලාන තරගාවලියට පළමු වරට සහභාගි වන අෆ්ගනිස්තාන් පිල සහ ශ්‍රී ලංකා ‘ඒ’ පිල අතර පුහුණු තරගය මේ මස 15 වැනිදා පෙරවරු 9.30 සිට කොළඹ මුවර්ස් ක‍්‍රීඩාංගණයේදී පැවැත්වීමට නියමිතය.