ශ්‍රී ලංකාවේ ජ්‍යෙෂ්ඨතම අන්තර්ජාතික රග්බි විනිසුරුවරයා වන ඩිල්රෝයි ප‍්‍රනාන්දු මහතා වසර 22 ක රග්බි විනිසුරු දිවියට සමුදීමට තීරණය කර තිබේ. ආසියානු රග්බි සංගමයේ විනිසුරුවන් පුහුණුකිරීමේ නිලධාරියකු සහ ආසියානු රග්බි තේරීම් කමිටුවේ සාමාජිකයකුද වන ඩිල්රෝයි ප‍්‍රනාන්දු මහතා ශ්‍රී ලංකාවෙන් බිහිවූ දක්‍ෂතම රග්බි පරිපාලන නිලධාරියකු ලෙස ද පිළිගැනේ.

ඩිල්රෝයි ප‍්‍රනාන්දු මහතා අන්තර්ජාතික රග්බි තරග වැඩිම සංඛ්‍යාවක විනිසුරු ලෙස කටයුතු කර ඇති ශ්‍රී ලංකා විනිසුරුවරයා ද වේ. ඔහු රග්බි ‘ටෙස්ට්’ තරග 25 කදී ද, අන්තර්ජාතික තරගාවලි 30 කදී විනිසුරු ලෙස කටයුතු කර තිබේ.

කොරියාවේදී පැවැති ආසියානු කුසලාන රග්බි තරගාවලියේ කොරියාව සහ ජපානය අතර පැවැති අවසන් මහ තරගයේ ප‍්‍රධාන විනිසුරු ලෙස සහ පොදු රාජ්‍ය මණ්ඩලයීය ක‍්‍රීඩා උළෙලේ රග්බි අවසන් මහ තරගයේ පැති විනිසුරුවකු ලෙස කටයුතු කිරීම ඒ මහතාගේ අන්තර්ජාතික විනිසුරු දිවියේ සුවිශේෂී සංධිස්ථාන ලෙස හැදින්විය හැකිය.

ප‍්‍රනාන්දු මහතා ශ්‍රී ලංකා අන්තර් සමාජ සහ පාසල් රග්බි තරග 550 කට අධික සංඛ්‍යාවකදී විනිසුරුවකු ලෙස සේවය කර තිබේ. ශ්‍රී ලංකා පාසල් රග්බි පිටියේ ප‍්‍රධානතම තරගය ලෙස සැළකෙන කොළඹ රාජකීය විදුහල සහ මහනුවර ත‍්‍රිත්ව විදුහල අතර ‘බ‍්‍රැඞ්බි පළිහ’ තරග 20 විනිසුරු ලෙස ප‍්‍රනාන්දු මහතා කටයුතු කර තිබේ.

ඒ මහතා විනිසුරුවකුට අමතරව ශ්‍රී ලංකා රග්බි සංගමයේ ප‍්‍රධාන විධායක නිලධාරියා ලෙස ද, ශ්‍රී ලංකාවේ පැවැති අන්තර්ජාතික තරගාවලිය කීපයකම තරගාවලි ප‍්‍රධානියා ලෙස ද කටයුතු කර තිබේ.

ශ්‍රී ලංකා රග්බි විනිසුරුවන් අතරින් පාසල් රග්බි ක‍්‍රීඩකයන්ගේ විනය පිළිබඳව දැඩිව කටයුතු කළ විනිසුරුවරයකු ලෙස ද ප‍්‍රනාන්දු මහතා පිළිගැනීමක් හිමිකරගෙන සිටියි.  

කොළඹ ඉසිපතන විදුහලේ සෑම වයස් කාණ්ඩයකම රග්බි කණ්ඩායම් වල නායකත්වය දරා ඇති 40 හැවිරිදි ඩිල්රෝයි ප‍්‍රනාන්දු මහතා හැව්ලොක්ස් මෙන්ම සී. ආර්. ඇන්ඞ් එෆ්. සී. යන ක‍්‍රීඩා සමාජ නියෝජනය කළ දක්‍ෂ ක‍්‍රීඩකයකුද වෙයි.