(සුජිත් හේවාජුලිගේ  සහ නිමන්ති රණසිංහ)

ශ්‍රී ලංකා රේගුවෙන් රාජසන්තක කෙරුණු මැලගසි රෝස (Rose wood) මෙට්‍රික් ටොන්  420 ක් බරැති  දැව කඳන් 3669 ක් විකිණීමට සැලසුම් කළද  වනජීවී සංරක්ෂණ දෙපාර්තමේන්තුවේ බලපත්‍රය ප්‍රමාදවීම හේතුවෙන් කාලයක් තිස්සේ ඒවා ගබඩාවල  තැබීමට සිදුවීම නිසා ගබඩා ගාස්තු ලෙස රුපියල් කෝටි අටකට වැඩි මුදලක්   වැය කිරීමට ශ්‍රී ලංකා රේගුවට සිදුව ඇතැයි ජාතික විගණන කාර්යාලය නිකුත් කළ වාර්තාවක සඳහන් වේ

පදම් නොකළ මෙම දැව කඳන්වලට  කෘමින්ගෙන් හානි සිදුව ඇතැයිද  එම වාර්තාවේ දැක්වේ.

ටැන්සානියාවේ ෂැන්සිබාර් වරායේ සිට ශ්‍රී ලංකා වරාය හරහා හොංකොං වෙත ප්‍රති අපනයනය කිරීම සඳහා මෙම දැව කඳන් ගෙනවිත් තිබුණේ  අප්‍රිකානු ඝන දැව ලෙස සඳහන් කරමිනැයි ශ්‍රී ලංකා රේගුව පවසයි.

බලපත්‍රය ප්‍රමාදවීම හේතුවෙන් මෙම දැව කඳන් තොගය  2014 වර්ෂයේ සිට 2023 අප්‍රේල් 30 වැනිදා දක්වා ඉවත් කර නොගෙන රේගු  අංගනයක ගබඩා කර තිබුණු බව විගණන වාර්තාවේ සඳහන් වේ.

මේ අතර ශ්‍රී ලංකා පරමාණුක බලශක්ති මණ්ඩලය විසින් 2021 අප්‍රේල් 23 වැනිදා ආනයනය කරන ලද අධිබලැති විකිරණශීලී මුලද්‍රව්‍යයක් සඳහා වරාය සංවර්ධන බදු සහ එකතු කළ අගය මත බදු වශයෙන් රේගුවට රුපියල් තුන් කෝටියකට වැඩි මුදලක්  ගෙවීමට ඇතත් මේ වර්ෂයේ ජනවාරි 1 වැනිදා වනවිටත්  එම බදු මුදල්   රේගුවට ගෙවා නොතිබූ බවද  එම වාර්තාවේ දැක්වේ.

මේ තොරතුරු සඳහන් වන්නේ ශ්‍රී ලංකා රේගුවේ 2022 වාර්ෂික වාර්තාවට ඇතුළත් කරනු ලැබ ඇති විගණන වාර්තාවේය.