අන්තර් පාසල් මයිලෝ කුසලාන දැල්පන්දු තරගමාලාව හෙට (26) දිවයිනේ මධ්‍යස්ථාන 16කදී ආරම්භ වේ. ඒ සඳහා පාසල් 350කින් කණ්ඩායම් ඉදිරිපත්ව ඇතැයි ශ්‍රී ලංකා පාසල් දැල්පන්දු සංගමය පවසයි. මේ වසරේ පටන් තරගමාලාවේ වෙනසක් ඇති කරමින් සහභාගි වන පාසල් කාණ්ඩ දෙකකට වර්ග කර තිබේ. සිසුන් දහසකට වැඩි පාසල් ”ඒ” කාණ්ඩයෙන් ද, සිසුන් දහසකට අඩු පාසල් ”බී” කාණ්ඩයෙන් ද මෙවර තරග වදිති. තරග මාලාවේ මූලික වටය කොළඹ, කළුතර, ගම්පහ, හෝමාගම, ගාල්ල, මාතර, මහනුවර, මාතලේ, කුරුණෑගල, පුත්තලම, අනුරාධපුර, අම්පාර, ත‍්‍රිකුණාමලය, යාපනය, රත්නපුර හා බදුල්ල යන මධ්‍යස්ථාන 16කදී පැවැත්වීමට නියමිතය. වයස 12න් පහළ, 14න් පහළ, 16න් පහළ හා 18න් පහළ යන කාණ්ඩ හතරකින් තරග මාලාව පැවැත්වේ. හෙට ආරම්භ වන තරග මාලාවේ මූලික වටය ජූනි 24 වැනිදා දක්වා පැවැත්වේ. අවසන් මහ තරග ලබන ජූලි 28, 29, 30 යන දිනවල පොලොන්නරුවේදී පැවැත්වේ. උතුරු හා නැගෙනහිර පළාතෙන් මෙවර පාසල් 15කින් කණ්ඩායම් ඉදිරිපත්ව සිටින බව සංවිධායකයෝ පවසති. වයස 12න් පහළ කණ්ඩයෙන් පාසල් 246ක් ද, 14න් පහළ කාණ්ඩයෙන් පාසල් 311ක් ද, වයස 16න් පහළ කාණ්ඩයෙන් පාසල් 219ක් හා 18න්පහළ කාණ්ඩයෙන් පාසල් 118කින් ද පරිදි මෙවර තරගාවලියට කණ්ඩායම් තරග වදිති. පසුගිය වසරේ මාතරදී පැවැති තරග මාලාවේදී කුරුණෑගල ශුද්ධ වූ පවුලේ බාලිකා විදුහල සුවිශේෂී දස්කම් දක්වමින් කාණ්ඩ හතරේම අවසන් මහ තරග සඳහා පිවිසෙමින් ශූරතා තුනක් දිනා ගැනීමට ද සමත් විය. තරග මාලාවේ ”බී” කාණ්ඩයේදී එප්පාවල සිද්ධාර්ථ විදුහල ශූරතා දෙකක් දිනා ගත්තේය.