සිය රංගන කුසලතාවෙන් පරිපූර්ණ ශිල්පියෙකු ලෙස ටෙලිනාට්‍ය, සිනමාව හා වේදිකාව තරණය කරන ඔහු විටෙක ස්වකීය හඬ පෞරුෂයෙන් නිවේදනයෙකුගේ කාර්යය නිරායසයෙන්ම සිදුකරයි. කලා පරපුරකින් පැවැත එන මොහු නමින් බිමල් ජයකොඩිය.  තමාට හුරු සංගීතයට යලි පා තබා ඇති බිමල් සිය කුලුඳුල් ගීතය නිර්මාණය කරේ මීට වසර දෙකකට පෙරය. එයින් පසු නිහඬව සිටි ඔහු නවතම ගීතයක් එළිදැක්වීමට සූදානමින් සිටියි. ඒ පිළිබඳව දැනගැනීමට බිමල් ජයකොඩි මෙලෙසින් සම්බන්ධ කරගත්තෙමු.

රංගන හැකියාව මෙන්ම ගීත ගායන හැකියාවද ඔබ තියෙන බව බොහෝ දන්නා කරුණක්. ඔබ ගීත ඇල්බමයක් කිරීමට බලාපොරොත්තුවක් නැද්ද?

ගීත ඇල්බමයක් කරන්න සංකීර්ණ වෙන්නේ නැතුව ඇත්තටම මම දැනටත් එක ගීතයක් පටිගත කරලයි තියෙන්නේ. ඉදිරියේදී තවත් මම ආස පද රචනයක් මට හම්බෙලා තියෙනවා. ඒක ඇත්තටම මගේ ඉල්ලීම  මතයි පද රචනය වුණේ. ඉතිං මම බෙහෙවින් ප්‍රිය කරන අධ්‍යක්ෂකවරු කිහිප දෙනෙක් ඉන්නවා. ඒ අතරින් කසුන් කල්හාරට කියලා ගීතයක් නිර්මාණය කරගන්නට ආසාවක් තියෙනවා. දැන් ඒ අවස්ථාව උදාවෙලා තියෙනවා. ගීත ඇල්බමයක් කියන සංකීර්ණ සහ විධිමත් කාරණයට යනවාට වඩා යම් විදියක නිර්මාණයක් කිරීමේ බලාපොරොත්තුවක් තියෙනවා.

ගීතයක් නිර්මාණය කිරීමට සඳහා ඔබ යොමුවෙන්නේ ඇයි?

මෙහෙමයි. මම රංගනය තෝරගන්න කලින් විෂයක් විදිහට පාසල් අවධියේදී සංගීත තමයි හැදෑරුවේ. ඒවගේමයි මම කාලාන්තරයක් පාසලේ අවසානයෙන් පස්සේ සංගීත කණ්ඩායමක වාදන ශිල්පියෙක් විදිහට කටයුතු කළා. ඒ කාලෙ රැල්ලට වගේ මියුසික් කරන එකට එහා ගිය වෘත්තීය විදිහට සංගීතයට මැදිහත් වෙලා හිටියා. එක්තරා තැනකදී ගමන් මාර්ග දෙක වෙනස් වුණා.

පළමු ගීතය වන 'ඔබ ආයේ දවසක'  ලැබුණු ප්‍රතිචාර කොහොමද?

මගේ විවාහ සංවත්සරයක් වෙනුවෙන් තමයි ඒ ගීතය නිර්මාණය කළේ. මගේ මිත්‍රයෙක් වන තේජ ඉද්දමල්ගොඩ තමයි ඒ ගීතය නිර්මාණය කරනු ලැබුවේ. ඒක මාධ්‍යයේ ප්‍රචාරය වෙනවාට වඩා මගේ යාළු මිත්‍රයන් තමයි ඒ ගීතය වැඩිපුර අහලා තියෙන්නේ. ඒක  මගේ විවාහ සංවත්සරය වෙනුවෙන් නිර්මාණය වුණු ගීතයක් නිසා පොදු ලක්ෂණයක් නෙමේ. ඒක ගොඩක් පුද්ගලික ලක්ෂණ සහිත ගීතයක්. ඒ සඳහා හොඳ ප්‍රතිචාර ලැබුණා මම ඉදිරියේදී කරන නිර්මාණ සඳහා වෙනසක් වෙයි කියලා හිතනවා.

ඩිලාන් ක්‍රිෂාන්ත / වීඩියෝ අනුග්‍රහය - අගස්ති ලියනගේ / Lanka Vid​ / Blog Video

​