(බණ්ඩාර ජයරත්න)

හෘදබාධයකින් මියගියේයැයි කියන පිය රැකවරණය අහිමි නව හැවිරිදි පුතකුගේ මෘතදේහය එළු ගාලක තහඩුවලින් හා සාරිවලින් ආවරණය කර තැන්පත් කර තැබූ පුවතක් අරණායක  සාමසර එළපිටිය ප්‍රදේශයෙන් අද වාර්තාවිය.

මෙලෙස එළු ගාලක තැන්පත් කර අත්තේ කාවින්ද දිනේෂ් නැමති නව හැවිරිදි  දරුවගේ සිරුරය.

ඉකුත් හතරවැනිදා මිය ගියේයැයි කියන පුතුගේ මළසිරුර රෝහලෙන් නිදහස් කරගැනීමට  බැරිවුයේ පුතුට උප්පැන්නය ලබාදී නොතිබුණු නිසා බවත් දින 17  පරක්කු වූ බවත් මව පැවැසුවාය.

මියගිය පුතුට අවසන් ගෞරව දැක්වීම සඳහා ප්‍රදේශවාසීන් විශාල පිරිසක් සහභාගි වී සිටියත් මව එම අවස්ථාවේ දිප්පිටිය නගරයට ගොස් සිටියේ පුතුගේ මිනිය මිහිදන් කිරීම සඳහා වෙලාවක් බලවා ගැනීම අරමුණින් ජ්‍යෙතීර්වේදියකු හමුවීම සඳහාය.

පියාගේ රැකවරණය අහිමි දියණියන් දෙදෙනාට හා මියගිය එකම පුතුට ද උප්පැන්නය ලබා දීමට නොහැකි වූ බව ද මව කීවාය.

මියගිය පුතු වසර ගණනාවක සිට හෘදයාබාධයකින් පිඩා විඳි බවත් එක පාරටම පුතුගේ රෝගී තත්වය පසුගිය 4 වැනිදා උත්සන්නවීම නිසා එළඟිපිටිය ජනපදයේ සිට මාවනැල්ල මූලික රෝහලව  වෙත ඇතුළත් කර කෙටි වෙලාවකින් රෝගී තත්වය තවත් උත්සන්න වී  පේරාදෙණිය රෝහල වෙත මාරු කර යවා සිටියදී එදින (04) රාත්‍රි 11.00 ට පමණ දරුවා මරණයට පත්වූ බව ද මව පැවැසුවාය.

පුතුගේ මව වන මාබෝපිටියලාගේ ජිවිකා ජයමිනි (32) මහත්මිය අප සමග මෙසේ කීවාය.
පුතාගේ මිනිය ගෙට ගත්තේ නැත්තේ, පුතා නැතිවෙලා මිනිය රෝහලේ තියෙද්දී දවස් හතක් ගත වෙන දින හාමුදුරුවෝ වැඩමවා බණක් කියල දානේ දුන්නා. ඒ නිසා නැවත ගේ ඇතුළට මිනිය ගන්න හොඳ නැහැ කියල මතයක් තිබුණු නිසා තාවකාලික මඩුවක මිනිය තියන්න තීරණය කළා.

මට තව අවුරුදු දහතුනක දියණියක් ඉන්නවා. එයාටත් පිළිකාවක් තියෙනවා. දැන් ඔපරේෂන් කරල එක්කගෙන ඇවිත් ගෙදර ඉන්නවා 

අපට රජයෙන් කියල කිසිම දෙයක් ලැබෙන්නේ නැහැ. ළමයින්ගේ තාත්තට අස්වැසුම හම්බවුණා.  ඒත් එයා අපි අතහැරල ගිහින් අපි දැන් පදිංචි වෙලා ඉන්නේ එළඟිපිටිය ජනපදයේ අම්මලාගේ  මුල් ගෙදර. ඒකත් දිරාපත්වූ නිවෙසක්. අපි අසරණ ජිවිතයක් ගතකරන්නේ යැයි කීවාය.