(යොහාන් භාසුර)

බත්තරමුලේ පිහිටි ආගමන විගමන දෙපාර්තමේන්තුවට විදේශ ගමන් බලපත්‍ර ලබාගැනීමට පැමිණෙන පුද්ගලයන් තව දුරටත් අපහසුතාවට පත්වන බව ජනතාව චෝදනා කරති.

විදේශ ගමන් බලපත්‍ර එක්දින සේවයෙන් ලබාගැනීම සඳහා පිට පළාත්වල සිට පැමිණෙන ජනතාව මෙසේ කාර්යාල පරිශ්‍රයේ බිම වාඩිවී සහ ඇතමුන් නිදාගෙන සිටින අතර එම කාර්යාල පරිශ්‍රයේ පහසුකම් නොමැති වීමෙන් ජනතාව දැඩි අපහසුතාවට පත්ව සිටිති.

එම කාර්යාල පරිශ්‍රයට පැමිණන ජනතාවට අවම වශයෙන් ආරක්‍ෂාව සහිතව යතුරුපැදියක් ගාල්කිරීමේ පහසුකම් නොමැති අතර කාර්යාලය අසළ මාර්ගයේ ගාල්කර තිබූ යතුරුපැදි කීපයක් පසුගිය කාලයේ සොරකම් කර ඇති බව ද වාර්තා වේ.

එම තත්වය මත ජනතාව යතුරුපැදි ඇතුළු වාහන පෞද්ගලික ස්ථානවල මුදල් ගෙවා ගාල්කරන අතර ඒ සඳහා පැයකට රුපියල් 50 යේ සිට රුපියල් 1000 ක් දක්වා අය කරයි.

ඇතැම් පුද්ගලයන්ට එක්දින සේවයෙන් විදේශ ගමන් බලපත්‍රය ලබාගැනීම සඳහා පැය හත අට කාලය ගත කරන්නට වීමෙන් වාහනයේ ගාල්කිරීමේ ගාස්තුව ලෙස ද විශාල මුදල් වැය කිරීමට සිදුවන බවත් යතුරුපැදි සඳහා භාවිතා කරන හෙල්මට් එකක් වෙනුවෙන් රුපියල් 50 ක් ද අය කරන බව ජනතාව පවසති.