නිමන්ති රණසිංහ සහ තරිඳු ජයවර්ධන
 
පැය නවය හමාරක් තිස්සේ ප්‍රකාශ ලබා දුන් ත්‍රස්ත විමර්ශන අංශය භාරව සිටි නියෝජ්‍ය පොලිස්පති නාලක ද සිල්වා මහතා මීට ටික වේලාවකට පෙර රහස් පොලිසියෙන් පිටව ගියේය.
 
ඔහු යළි හෙට උදේ රහස් පොලිසියට කැඳවූ බව එහි ආරංචි මාර්ග කියයි.
 
නාලක ද සිල්වා මහතා රහස් පොලිසියෙන් ඇසූ ප්‍රශ්නවලට දුන් පිළිතුරු තහවුරු කර ගැනීමට ද කටයුතු කරන බව එහි ආරංචි මාර්ග පවසයි.
 
අද උදේ 9.15ට රහස් පොලිසිය හමුවේ පෙනී සිටි නාලක ද සිල්වා මහතාගෙන් අපරාධ පරීක්ෂණ දෙපාර්තමේන්තු පස්වරු 6.50 පමණ වන තෙක් ප්‍රශ්න කර ප්‍රකාශ සටහන් කර ගත්තේය. විමර්ශනයේ දී හෙළිකර ගත් තොරතුරු ගැන ඔහුගෙන් තවදුරටත් ප්‍රශ්න කිරීමට තිබෙන බව රහස් පොලිසිය කියයි.
 
ජනාධිපති මෛත්‍රීපාල සිරිසේන මහතා, හිටපු ආරක්ෂක ලේකම් ගෝඨාභය රාජපක්ෂ මහතා සහ සහකාර පොලිස් අධිකාරී ප්‍රසන්න අල්විස් මහතා ඝාතනය කිරීමට කුමන්ත්‍රණය කළැයි කියමින් නාමල් කුමාර නම් පුද්ගලයකු කළ පැමිණිල්ලක් අනුව රහස් පොලිසිය මෙම විමර්ශනය පවත්වයි.
 
පොලිසියේ ප්‍රධාන අවි ගබඩාවෙන් ත්‍රස්ත විමර්ශන අංශය වෙත එල්එම්ජී අවි දෙකක් නිකුත් කර ඇති බවත්, එම අවි දෙක දින දෙකක් පිටතට රැගෙන ගොස් යලි ගෙනැවිත් ඇති බවත් මෙම විමර්ශනයේ දී රහස් පොලිසිය අනාවරණය කරගෙන තිබේ. එලෙස අවි රැගෙන ගියේ නාලක ද සිල්වා මහතාගේ උපදෙස් මත යැයි සාක්කිකරුවන් ප්‍රකාශ කර ඇති බැවින් ඝාතන කුමන්ත්‍රණය ගැන මෙන්ම මෙම සිද්ධිය ගැන ද නාලක සිල්වා මහතාගෙන් තවදුරටත් ප්‍රශ්න කිරීමට නියමිත බව රහස් පොලිස් ආරංචි මාර්ග කියයි.

ඡායාරූප -  ළහිරු හර්ෂණ