දකුණු අප‍්‍රිකාවේ කේප් ටවුන් නගරයේදී රටවල් 20 ක සහභාගීත්වයෙන් පැවැත්වෙන පොදුරාජ්‍ය මණ්ඩලයීය බර ඉසිලීමේ ශූරතාවලියේදී රන් පදක්කම් දෙකක් දිනා ගැනීමට ශ්‍රී ලංකා කී‍්‍රඩකයෝ අද(11) සමත්වුහ. ශ්‍රී ලංකා ක‍්‍රීඩක සංගීත් විජේසුරිය කිලෝග‍්‍රෑම් 56 බර පංතියේ රන් පදක්කම දිනාගත් අතර එම්. එස්. ඒකනායක යොවුන් තරගාවලියේදී කිලෝග‍්‍රෑම් 50 බර පංතියේ රන් පදක්කම දිනා ගැනීමට සමත්විය. කිලෝග‍්‍රෑම් 56 බර පංතිය නියෝජනය කළ ශ්‍රී ලංකා ක‍්‍රීඩක කමල් බණ්ඩාර රිදී පදක්කම දිනා ගනිමින් දස්කම් දැක්වීය. මෙම තරගයේදී ස්නැච් ක‍්‍රමයට කිලෝග‍්‍රෑම් 103 ක්, ක්ලීන් ඇන්ඞ් ජර්ක් ක‍්‍රමයට කිලෝග‍්‍රෑම් 133 ක් සහ එකතුව කිලෝග‍්‍රෑම් 236 ක් ඔසවමින් සංගීත් රන් පදක්කම දිනා ගත්තේය. රිදී පදක්කම් ලාභී කමල් බණ්ඩාර ස්නැච් ක‍්‍රමයට කිලෝග‍්‍රෑම් 98 ක්, ක්ලීන් ඇන්ඞ් ජර්ක් ක‍්‍රමයට කිලෝග‍්‍රෑම් 129 ක් සහ එකතුව 227 ක් එසවීමට සමත්විය. නවුරු දුපත්’හි එල්සන් බ‍්‍රැචට්ෆීල්ඞ් ලෝකඩ පදක්කම දිනා ගත් අතර ඔහු ස්නැච් ක‍්‍රමයට කිලෝග‍්‍රෑම් 97 ක්, ක්ලීන් ඇන්ඞ් ජර්ක් ක‍්‍රමයට කිලෝග‍්‍රෑම් 121 ක් සහ එකතුව කිලෝග‍්‍රෑම් 218 ක් එසවීය. ඒකනායක රන් පදක්කම සඳහා ස්නැච් ක‍්‍රමයට කිලෝග‍්‍රෑම් 71 ක්, ක්ලීන් ඇන්ඞ් ජර්ක් ක‍්‍රමයට කිලෝග‍්‍රෑම් 95 ක් සහ එකතුව කිලෝග‍්‍රෑම් 166 ක් එසවීය. එහිදී ඉන්දියාව රිදී පදක්කම දිනාගත් අතර දකුණු අප‍්‍රිකාවට ලෝකඩ පදක්කම හිමිවිය. යොවුන් තරගාවලියේ කිලෝග‍්‍රෑම් 48 බර පංතියෙන් (කාන්තා) තරග කළ ඞී. ඞී. අබේසේකර ට සිවුවැනි ස්ථානය හිමිවිය. මේ මස 15 වැනිදා දක්වා පැවැත්වෙන මෙම තරගාවලියට සහභාගිවන ශ්‍රී ලංකා පිලට ක‍්‍රීඩකයෝ අට දෙනෙක් සහ ක‍්‍රීඩිකාවෝ දෙදෙනෙක් ඇතුළත්වෙති. පසුගිය වසරේ නවදිල්ලි නුවරදී පැවැති පොදුරාජ්‍ය මණ්ඩලයීය කී‍්‍රඩා උළෙලේදී ලෝකඩ පදක්කමක් දිනාගත් සුදේශ් පීරිස් ද තරගාවලියට සහභාගිවී සිටියි.