(සුජිත් හේවාජුලිගේ)

පාර්ලිමේන්තු මැතිවරණය අවසන්වූ වහා  හැකි ඉක්මනින්ම පළාත් පාලන ආයතන  ඡන්ද විමසීම පවත්වන බව මැතිවරණ කොමිෂන් සභාව පවසයි.

මහ මැතිවරණය අවසන්වූ වහාම පළාත් පාලන ආයතන  ඡන්ද විමසීම සඳහා දින නියම කරන බවද  කොමිසම නිකුත් කළ නිවේදනයක සඳහන් වේ.

ශ්‍රේෂ්ඨාධිකරණය පසුගිය අගෝස්තු මස 22 වැනි දා දුන් නියෝගයට අනුකූලව මැතිවරණ පැවැත්වීමේ කාර්යභාරය අනුව කටයුතු කරන බව කොමිසම ප්‍රකාශ කරයි.

ඉදිරි මැතිවරණ සඳහා අවශ්‍ය මුදල්  දෙන බවට රජය දැනටමත් පොරොන්දුවී ඇතැයි පවසන මැතිවරණ කොමිෂන් සභාව මහ මැතිවරණය සඳහා රුපියල් කෝටි 1100 ක් ලබාදීමට කැබිනට් මණ්ඩලය  අනුමැතිය දුන් බවද ප්‍රකාශ කළේය.

මේ අතර මහ මැතිවරණයේ ඡන්ද පත්‍රිකා  මුද්‍රණය වෙනුවෙන් ජනාධිපතිවරණයට සාපේක්ෂව වැඩි මුදලක් වැය කිරීමට සිදුවන බව මැතිවරණ කොමිෂන් සභාව පවසයි.

ඊට හේතු වී ඇත්තේ  මහ මැතිවරණයේදී  දිස්ත්‍රික් මට්ටමින් වෙන වෙනම ඡන්ද පත්‍රිකා මුද්‍රණය කිරීමට සිදුවීම නිසා   බව එහි ප්‍රකාශකයෙක් පැවසීය.