(සුජිත් හේවාජුලිගේ සහ  අංජුල මහික වීරරත්න)

පොලිස්පති දේශබන්දු තෙන්නකෝන් මහතා ධූරයේ බලතල අනිසි ලෙස පාවිච්චි කර ඇතැයි එල්ල වී ඇති චෝදනා සම්බන්ධයෙන්  විමර්ශන පවත්වන ත්‍රිපුද්ගල කමිටුව හමුවේ ලබන 19 වැනිදා පෙනී සිටින ලෙස තෙන්නකෝන් මහතාට පළමු වතාවට දැනුම් දී ඇත.

මේ අනුව දේශබන්දු තෙන්නකෝන්  මහතා නීතිඥවරුන්ද සමග එම කමිටුව හමුවේ එදින පෙනී සිටිනු ඇත.

ශ්‍රේෂ්ඨාධිකරණයේ විනිසුරු ප්‍රීති පද්මන් සූරසේන මහතාගේ සභාපතිත්වයෙන් යුතු මෙම කමිටුවේ සෙසු සාමාජිකයන් ලෙස අල්ලස් හෝ දූෂණ චෝදනා විමර්ශන කොමිෂන් සභාවේ සභාපති අභියාචනාධිකරණයේ හිටපු විනිසුරු නීල් ඉද්දවල සහ  ජාතික පොලිස් කොමිෂන් සභාවේ සභාපති ලලිත් ඒක නායක යන මහත්වරු කටයුතු කරති.

මෙම කමිටු සාමාජිකයන් පාර්ලිමේන්තුවේදී දින පහක් පමණ රැස්වී මේ පිළිබඳව විමර්ශන පවත්වා ඇත.

විමර්ශනවලදී අනාවරණය වන තොරතුරු අනුව පොලිස් නිලධාරීන් ඇතුළු  රජයේ නිලධාරින් පිරිසක්ද මෙම කමිටුව හමුවට කැඳවීමට නියමිතය.

මෙම ත්‍රිපුද්ගල කමිටුව පත් කෙරුණේ පාර්ලිමේන්තුවේදී සම්මත කෙරුණු යෝජනාවකින් අනතුරුවය.

කමිටුව දේශබන්දු තෙන්නකෝන් මහතාට එරෙහි චෝදනා විමර්ශන කිරීමෙන් අනතුරුව ඒ පිළිබඳ අවසාන වාර්තාව කතානායකවරයාට භාර දීමට නියමිතය.

දේශබන්දු තෙන්නකෝන් මහතා ධූරයෙන් නෙරපීමේ යෝජනාව පාර්ලිමේන්තුවට ඉදිරිපත් කෙරෙන්නේ ඉන් අනතුරුවය.