(ඔගස්ටින් ප්‍රනාන්දු)                

බිරිඳ සමඟ ඇති වූ ආරවුලකින් පසු දරු දෙදෙනාට වස පොවා ස්වාමි පුරුෂයා නිවස තුළ ගෙල වැලලාගෙන අද (25) දහවල් දිවි නසා ගෙන ඇති බව උඩප්පුව පොලිසිය කියයි.

මිය ගොස් ඇත්තේ උඩප්පුව පල්ලිවාසල්පාඩුවේ පදිංචි නැමැති 13 හැවිරිදි විලියම් මැසෙව් සහ  7 හැවිරිදි ශෝන් මිලරෝධ නැමැති දරුවන් දෙදෙනාය. සිය දිවි නසා ගෙන ඇති පියා 31 හැවිරිදි වර්ණකුලසුරිය අසංක සනත් නැමැත්තා බව පොලිසිය කියයි.

මිය ගිය පුද්ගලයා ධීවර රැකියාවේ නිරත වී ඇති බවත් සිය බිරිඳ සමඟ ආරාවුලක් ඇති කරගැනීම හේතුවෙන් ඔහුගේ බිරිඳ මාස දෙකකට පෙර අමනාප වී නිවසින් ගොස් ඇති බවත් එම පුද්ගලයා බිරිඳ ගෙන්වා ගැනීමට දැඩි උත්සහයක නිරත වී ඇති බවත් පොලිසිය කියයි.

අද (25) පෙරවරු කාලයේ දී මිය ගිය පුද්ගලයා තම පුතුන් දෙදෙනාට වස වර්ගයක් පොවා ඇති අතර අසල්වාසීන් ඒ බව දැක වහාම දරුවන් පුත්තලම මූළික රෝහලට ගෙන ගියත් ඔවුන් ඒ වන විට මිය ගොස් සිටි බවත් පොලිසිය කියයි.

දරු දෙදෙනා මිය ගිය බව දැන ගත් මිය ගිය පුද්ගලයා වහලේ කඹයක් බැද ගෙල වැලලාගෙන සිය දිවි නසා ගෙන ඇති බව පොලිසිය පැවැසීය.

මෙම තිදෙනාගේ මරණ පරීක්ෂණ කටයුතු හෙට (26 ) පුත්තලම මූලික රෝහලේ දී සිදු කිරීමට නියමිතව ඇත.