දියගම ‘මහින්ද රාජපක්ෂ’ ක‍්‍රීඩාංගණයේදී ඊයේ (13) නිමාව දුටු 55 වැනි ජාතික කනිෂ්ඨ මලල ක‍්‍රීඩා ශූරතාවලියේදී ක‍්‍රීඩක කී‍්‍රඩිකාවන් දෙදෙනකු ලෝක කනිෂ්ඨ පරිසාධන මට්ටමට පිවිසෙමින් දස්කම් දැක්වීමට සමත් වූහ. මෙම ක‍්‍රීඩකයාට හා ක‍්‍රීඩිකාවට ලබන ජූලි 10 වැනිදා ස්පාඤ්ඤයේ ”බාසිලෝනා” නුවරදී පැවැත්වෙන ලෝක කනිෂ්ඨ මලල ක‍්‍රීඩා තරගාවලියට සහභාගිවීමේ අවස්ථාව උදාවනු ඇත. ගලෙන්බිඳුණුවැව මැදි විදුහලේ නිමේෂා මධුෂානි සිරිවර්ධන (උස පැනීම - බාලිකා - වයස 20න් පහළ - මීටර 1.80) හා ගන්නොරුව රණබිම රාජකීය විදුහලේ කේ.ඞී.එස්.වී. රන්දෙනිය (මීටර 110 කඩුලූ බාලක - වයස 20න් පහළ - තත්ත්පර 14.22) ලෝක කණිෂ්ඨ පරිසාදන මට්ටමට ළඟාවෙමින් තරගාවලියේදී හොඳම දස්කම් දැක්වූ ඔවුන් දෙදෙනා වෙති. ඒ අනුව මෙවර ලෝක කනිෂ්ට මලල ක‍්‍රීඩා තරගාවලියට සහභාගි වන ශ්‍රී ලංකා ක‍්‍රීඩක ක‍්‍රීඩිකාවන්ගේ ගණන හතරක් දක්වා ඉහළ යයි. ශ්‍රී ලංකා මලල ක‍්‍රීඩා සංගමයේ නව පාලනය පත්වීමෙන් පසු පැවැති පළමු දේශීය මලල ක‍්‍රීඩා තරගාවලිය වන ජාතික කනිෂ්ඨ තරගාවලිය දින හතරක් පුරා ඉසව් 170කින් සමන්විතව (වයස් කාණ්ඩ හතරක් යටතේ) පැවැත්වුණි. දේශීය මලල ක‍්‍රීඩාවේ අලූත්ම අනුග‍්‍රාහකයා බවට පත්ව සිටින ලංකා බැංකුව ඒ සඳහා වියදම් දැරීය. මෙම තරගාවලියේ ප‍්‍රතිඵල විශ්ලේෂණය කරමින් ලබන ජූනි 9 වැනිදා කොළඹදී ආරම්භ වන ආසියානු කනිෂ්ඨ මලල ක‍්‍රීඩා ශූරතාවලිය සඳහා සහභාගි වන ශ්‍රී ලංකා කණ්ඩායම තෝරා ගැනීමට නියමිතය. ඒ සඳහා ජාතික මලල ක‍්‍රීඩා තේරීම් කමිටුව අද (14) රැස්වීමට නියමිතව තිබුණි. තරගාවලියේදී සත්කාරය දරන ශ්‍රී ලංකාවට එහිදී එක් ඉසව්වක් සඳහා උපරිම ක‍්‍රීඩක ක‍්‍රීඩිකාවන් තිදෙනෙකු බැගින් ඉදිරිපත් කිරීමේ අවස්ථාව උදාවේ. එහෙත් ඇතැම් ඉසව්වලදී ශ්‍රී ලංකා ක‍්‍රීඩක ක‍්‍රීඩිකාවන්ගේ පරිසාදන මට්ටම අවම මට්ටමක පවතින බැවින් එවැනි ඉසව් සඳහා ක‍්‍රීඩක ක‍්‍රීඩිකාවන් සහභාගි කිරීමට ශ්‍රී ලංකාව උනන්දු නොවනු ඇත. ඊයේ නිමාවට පත්වූ තරගාවලියේදී නව වාර්තා 29ක් බිහි වූහ. මේ අතර තරගාවලියේදී සේවය ලබාදුන් විනිසුරුවන් හා තීරකවරුන් 129 දෙනෙකු සඳහා දීමනා ගෙවිමේදී අර්බුදයක් මතුවූ බවද වාර්තාවේ. ඊට හේතු වී ඇත්තේ ඔවුන්ගේ ගෙවීම් සඳහා ප‍්‍රමාණවත් ලෙස මුදල් වෙන්කර නොතිබීම බවද දැනගන්නට ඇත. මේ නිසා ඇතැම් විනිසුරුවන් තරගාවලියෙන් පසු කණස්සල්ලට පත්ව සිටි බවද දැනගන්නට ඇත.