(සුජිත් හේවාජුලිගේ සහ  අංජුල මහික වීරරත්න)

අගමැතිවරයා  පත්කර කැබිනට් මණ්ඩලය වහාම  ස්ථාපනය කරන්නැයි  ජනාධිපතිවරයාට දැනුම් දෙන ලෙස පක්ෂ නායකයෝ  කතානායක මහින්ද යාපා අබේවර්ධන මහතාගෙන් පාර්ලිමේන්තු කටයුතු පිළිබඳ කාරක සභා රැස්වීමේදී අද (11) ඉල්ලීමක්  කළහ.

මෙම රැස්වීම ආරක්ෂක හේතූන් මත ඊයේ පැවැත්වුණේ සූම්  තාක්ෂණය ඔස්සේය.

එම ඉල්ලීම තමන් ලිඛිතව බාරදෙන බවද පක්ෂ නායකයන් මෙහිදී සඳහන් කර  ඇත.

ඒ අනුව කතානායකවරයා එම ඉල්ලීම කිරීමට සියලු කටයුතු සූදානම් කරගෙන යන බව පාර්ලිමේන්තු ආරංචි  මාර්ගවලින් පැවසෙයි.

මේ අතර රටේ පවතින තත්වය හමුවේ පාර්ලිමේන්තු මන්ත්‍රීවරුන්ගේ සහ සමස්ත ජනතාවගේ ආරක්ෂාව තහවුරු කිරීමට අවශ්‍ය පියවර ගන්නැයිද  පක්ෂ නායකයන් කතානායකවරයාගෙන් මෙම රැස්වීමේදී ඉල්ලීමක් කර ඇත.

මේ අතර ජනාධිපතිවරයාට එරෙහිව  සමගි ජන බලවේගය පක්ෂය බාරදී ඇති  විශ්වාසය කඩවීම පිළිබඳ යෝජනාව  ලබන සතියේ විවාදයට ගැනීමටද කතානායකවරයා මෙහිදී එකඟවී ඇතැයි  වාර්තා වේ.

පාර්ලිමේන්තුවේ පක්ෂ නායකයන්  පාර්ලිමේන්තු සංකීර්ණයේදී හෙට (12) උදේ  9.30ට  නැවත  හමුවීමටද   තීරණය කර ඇත.

පාර්ලිමේන්තුව ලබන 17 වැනිදා රැස්වෙන බව කතානායකවරයා  පාර්ලිමේන්තු කටයුතු පිළිබඳ කාරක සභා රැස්වීමේ දී  සඳහන් කර ඇත.

මේ  සූම්  රැස්වීමට  විපක්ෂ නායක සජිත් ප්‍රේමදාස ,  රනිල් වික්‍රමසිංහ, රවුෆ් හකීම්, රංජිත් මද්දුමබණ්ඩාර ,එම්.ඒ සුමන්දිරන්  ඇතුළු පක්ෂ නායකයෝ රැසක් සහභාගී වූහ.