(සුජිත් හේවාජුලිගේ )

සමාජයේ  කොවිඩ්  පැතිරීම වැඩි වීම සමග කොවිඩ්  ආසාදිත දරුවන්   රෝහල්වලින් වාර්තාවීමද ඉහළ  යමින් පවතින බව  කොළඹ රිජ්වේ ආර්යා ළමා රෝහලේ ළමා රෝග පිළිබඳ විශේෂඥ වෛද්‍ය දීපාල් පෙරේරා මහතා පැවසීය.

කොවිඩ්  ආසාදිත දරුවන් පස්දෙනකු කොළඹ රිජ්වේ ආර්යා ළමා රෝහලෙන් පසුගිය දිනවල හමුවූ බවද හෙතෙම සඳහන් කළේය.

මේ දරුවන් පස්දෙනා වාර්තා වී ඇත්තේ  එකම කොවිඩ්  ආසාදිත දරුවකු හෝ වාර්තා නොවී පැවති පසුබිමක වීම  විශේෂත්වයකි.

මේ වසරේ මුල් කාලයේදී වරින් වර  කොවිඩ්  ආසාදිත දරුවන් 315ක් පමණ කොළඹ රිජ්වේ ආර්යා ළමා රෝහලෙන් වාර්තා වූ අතර පසුව එම සංඛ්‍යාව බින්දුව දක්වා පහළ  ගොස් තිබුණු බව රෝහල් ආරංචිමාර්ග වලින් පැවසිණ.

දරුවන්ට උණ සෙම්ප්‍රතිශ්‍යාව වැනි රෝග ලක්ෂණ පවතී නම් ඔවුන් පාසල් පාසල් යැවීමෙන් වළකින ලෙස විශේෂඥ වෛද්‍ය දීපාල් පෙරේරා මහතා මවුපියන්ගෙන් ඉල්ලීමක් කරයි.

එවැනි ලක්ෂණ පවතී නම් දරුවන්ට  මුවා ආවරණයක් පැලඳීමට  ලබාදිය යුතු බවත් ඔවුන් අනෙක් අයගෙන් තරමක් ඈත් කර  තැබීම  වැනි සෞඛ්‍ය ආරක්ෂක ක්‍රමවේද අනුගමනය කිරීම ඉතා වැදගත් බවත්  ඔහු සඳහන් කළේය.

පොදුවේ සමාජයේ කොවිඩ්  පැතිරීම ද වැඩි වී ඇති හෙයින් විශේෂයෙන් ම පොදු ස්ථානවලදී මුව ආවරණ පැලදීම  අනිවාර්යෙන්ම කළ යුතු  බවද  විශේෂඥ වෛද්‍යවරයා පැවසුවේය.

මේ අතර  සැකකටයුතු රෝග ලක්ෂණ සහිත රෝගීන් කොරෝනා පරීක්ෂණ පරීක්ෂණවලට යොමු කිරීම සහ  යොමුවීම බෙහෙවින්ම  අඩු වී ඇති හෙයින්  සමාජයේ කොවිඩ්   රෝගීන් පිළිබඳව නිවැරදි  මිම්මක්  ලබා ගැනීමට අද දවසේ  නොහැකි වී ඇතැයි සෞඛ්‍ය අංශ නිලධාරීහු පවසති.