(ඩී.ජී.සුගතපාල)

කොරෝනා බවට සැක සහිත රෝගීන් ඇතුළත් කිරීම සඳහා ඇල්පිටිය රෝහලේද විශේෂිත වාට්ටුවක් සුදානම් කරමින් පවතින බව දකුණු පළාත් සෞඛ්‍ය සේවා අධ්‍යක්ෂ කාර්යාලය පවසයි.
 
කොරෝනා වයිරසය වැළඳුන රෝගීන් ඇතුළත් කරගන්නා දකුණු පළාතේ  එකම රෝහල කරාපිටිය රෝහල වන අතර දැනට පවතින තත්වය අනුව ඉදිරියේදි රෝගින්ගේ වැඩිවීමක් සිදුවී කරාපිටිය රෝහලේ ඉඩ කඩ ප්‍රමාණවත් නොවුනහොත් ඒ සඳහා ඇල්පිටිය රෝහලේ වාට්ටුවක් සුදනම් කරමින් පවතින බවද සෞඛ්‍ය සේවා අධ්‍යක්ෂ කාර්යාලය පවසයි.
 
එයට අමතරව බුස්ස නිරෝධායන මධ්‍යස්ථානයේද ඉඩ කඩ ප්‍රමාණවත් නොවුණහොත් ඉදිරිදිනවල නිරෝධායනයට යොමු කරන පිරිස් සඳහා දඩල්ල ප්‍රදේශයේ මධ්‍යස්ථානයක්සූදානම් කරමින් පවතින බවද සෞඛ්‍ය සේවා අධ්‍යක්ෂ කාර්යාලය පවසයි.
 
අද(21) උදෑසන වනවිට කරාපිටිය රෝහලේ සැක සහිත රෝගින් දෙදෙනෙකු ප්‍රතිකාර ලබමින් සිටි අතර  බූස්ස නිරෝධායන මධ්‍යස්ථානයේ රඳවා සිටින සංඛ්‍යාව 11 දෙනෙකි. එම 11දෙනා  දෙනා අතර විදේශිකයින් දෙදෙනෙක්ද රත්ගම ප්‍රදේශයේ සංචාරක හෝටලයකදි සොයා ගන්නා ලද කොරෝනා ආසාදිත ජපන් ජාතිකයාගේ 18 හැවිරිදි දියණියද වෙති.