(අංජුල මහික වීරරත්න)

වෛද්‍ය සැපයුම් අංශය සඳහා ගබඩා පහසුකම් ලබා ගැනීමට කැබිනට් අනුමැතිය ලැබී ඇත.

සෞඛ්‍ය සහ ජනමාධ්‍ය අමාත්‍යාංශය යටතේ පාලනය වන වෛද්‍ය සැපයීම් අංශය මඟින් රෝගී සත්කාරක සේවාවන් සඳහා අවශ්‍ය වන ඖෂධ සහ අනෙකුත් වෛද්‍ය සැපයීම් හා ඖෂධ අයිතමයන් සපයාගෙන ගබඩාගත කර සෞඛ්‍ය ආයතන වෙත ඛෙදා හැරීම සිදු කරනු ලැබේ. දැනට වෛද්‍ය සැපයීම් අංශය සතුව පවතින ගබඩා පහසුකම් ප්‍රමාණවත් වනුයේ සමස්ත වාර්ෂික ඖෂධ පරිභෝජනයෙන් ආසන්න වශයෙන් දින 22 ත් 30 ත් අතර කාලයක් සඳහා වූ තොග ගබඩා කර තබා ගැනීමට පමණි. කෙසේ වුවද, නියමිත කාලයේදීම ඇණවුම් ලබා දීම මඟින් සියලුම සැපයුම් වල මාස 06කට වැඩි කාලයක් සඳහා අවශ්‍ය වන සැපයුම් ඉදිරි මාස කිහිපය තුළ ලබා ගැනීම තුළින් ඖෂධ හිඟය අවම කිරීමටත්, මාස 03 ක කාලයක් සඳහා ස්වාරක්ෂක තොගයක් පවත්වා ගෙන යාමටත් මේ වන විට සැලසුම් කර ඇති බැවින් එයට ගැලපෙන පරිදි ගබඩා ධාරිතාව වැඩි කර ගැනීමේ දැඩි අවශ්‍යතාවක් මතු වී ඇත. 

ඒ අනුව, අදාළ කාර්යය සඳහා භාවිත කිරීමට හැකි වන පරිදි ආහාර කොමසාරිස් දෙපාර්තමේන්තුව සතු වේයන්ගොඩ පිහිටි ඉඩමේ ඉදි කර ඇති වර්ග අඩි 30,000 බැගින් වූ ශිතදාම ගබඩා දෙකද ඇතුළුව ගබඩා ගොඩනැගිලි 03 ක් හා ඊට අදාළ ඉඩම් කොටස සෞඛ්‍ය සහ ජනමාධ්‍ය අමාත්‍යාංශය වෙත පැවරීම පිණිස සෞඛ්‍ය සහ ජනමාධ්‍ය අමාත්‍ය සහ වෙළෙඳ, වාණිජ, ආහාර සුරක්ෂිතතා සහ සමූපකාර සංවර්ධන අමාත්‍යවරයා  ඒකාබද්ධව ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.