(සුජිත් හේවාජුලිගේ)

අයහපත් කාලගුණයෙන් වගා බිම් රැසක් විනාශවීම හේතුවෙන් එළවළු මිල ශීඝ්‍ර ලෙස ඉහළ යෑමෙන් ජනතාව අපහසුතාවයට පත්ව සිටිති.

උඩරට එළවළුවලට සාපේක්ෂව පහතරට එළවළු මිලද සැලකිය යුතු ලෙස ඉහළ ගොස් ඇත.

උත්සව සමය ඉදිරියේදී පැමිණෙන හෙයින් එළවළු මිල ඉහළ යාම හේතුවෙන් ජනතාවට ලොකු ප්‍රශ්නයකට මුහුණ දීමට සිදුවනු ඇත.

ශ්‍රී ලංකා මහ බැංකුවේ දෛනික මිල දර්ශනයට අනුව ඊයේ වනවිට පිටකොටුව, දඹුල්ල මෙන්ම නාරාහේන්පිට ආර්ථික මධ්‍යස්ථානවල බෝංචි කිලෝවක් රුපියල් 600ත් 800ත් අතර සිල්ලර මිලකටත් තක්කාලි කිලෝවක් රුපියල් 500ත් 600ත් අතර සිල්ලර මිලකටත් පතෝල කිලෝවක් රුපියල් 600ත් 700ත් අතර සිල්ලර මිලකටත් අමු මිරිස් කිලෝවක් රුපියල් 1100ත් 1200ත් අතර සිල්ලර මිලකටත් අලෙවි වී තිබුණි.

එමෙන්ම වම්බටු කිලෝවක් රුපියල් 550ත් 800ත් අතර සිල්ලර මිලකට අලෙවි වී ඇති අතර කැරට් සහ ගෝවා කිලෝවක් රුපියල් 300ත් 500ත් අතර සිල්ලර මිල ගණන්වල පවතින බව වාර්තා වේ.