(සිතුම් චතුරංග)

උතුරේ ක්‍රියාත්මක ආවා මැරකල්ලියේ සාමාජිකයින් රැස්කොට ඔවුන් සඳහා සාදයක් සංවිධානය කොට උපහාර උළෙලක් පවත්වමින් සිටි තරුණයින් 16 දෙනකු වවුනියාව, ඕමන්ත, කෝලික්කුලම ප්‍රදේශයේදී අත්අඩංගුවටගත් බව පුලියංකුලම පොලිස් විශේෂ කාර්ය බලකාය පවසයි.

වවුනියාව දිස්ත්‍රික් පළමු සැමරුම නමින් උතුරු පළාතේ ක්‍රියාත්මක ආවා කොල්ලකල්ලියේ නායකයින් යැයි පැවසෙන කණ්ඩායම් හා එක්ව තරුණයින් 40කට අධික පිරිසක් එක්ව මෙම සාදය හා උපහාර උළෙල පවත්වමින් සිටි බවද පොලිස් විශේෂ කාර්ය බලකාය සඳහන් කළේය.

පොලිස් විශේෂ කාර්ය බලකාය වෙත ලැබුණ බුද්ධි තොරතුරක් අනුව සිදුකළ වැටලීමකදී සැකකාර තරුණයින් 16 දෙනා අත්අඩංගුවටගෙන ඇතිඅතර ඔවුන් සමග සිටි ආවා කල්ලියේ නායකයින් බවට හැදින්වෙන පිරිසක් ඇතුළු පුද්ගලයින් 20ක් වැටලීම සිදුකරන අවස්ථාවේ පොලිස් ග්‍රහනයෙන්  මිදී පැනගිය බවත් පොලිස් විශේෂ කාර්ය බලකාය පැවසීය.

 ආවා කල්ලි සාමාජිකයින් රැස්ව සිටි ස්ථානයේ තිබී ‘‘ආවා 001‘‘ නමින් සඳහන් කළ පෝස්ටර් ,‘අපේ රාජධානිය‘ නමින් නිර්මාණය කළ බැනර් සහ ආවා කල්ලියේ නායකයින් බවට හදුන්වන පුද්ගලයින්ගේ රුව සහිත බැනර් කිහිපයක්ද පොලිස් විශේෂ කාර්ය බලකා බාරයට ගෙන තිබේ.

ෆේස්බුක් සමාජ ජාලා ඔස්සේ මෙම පිරිස සංවිධානය වී ඇති අතර ඔවුන් සතුව තිබූ ස්මාට් වර්ගයේ ජංගම දුරකථන රැසක් පොලිස් භාරයටගත් බවද කීය.

අත්අඩංගුවට ගත් සැකකරුවන් අතරින් 14 දෙනෙකු වයස අවුරුදු 18 ත් 24 ත් අතර තරුණයින් වන පිරිසක් වන අතර, පුද්ගලයින් දෙදෙනෙකු පමණක් අවුරුදු 44 ක් හා 45 ක් වයසේ පසුවන බවද පොලිස් විශේෂ කාර්ය බළකාය පැවසූහ.