(නිමන්ති රණසිංහ)

ජර්මන් ජාතික පවුලක් ජීවත් වූ මීගමුව ප්‍රදේශයේ පිහිටි නිවසක් ඊයේ (09) කිසියම් පිරිසක් විසින් කොල්ල කා ගිනි තබනු ලැබ ඇතැයි වාර්තා වෙයි.

එම නිවසේ ජීවත් වූ ජර්මන් ජාතික කාන්තාව සදහන් කර සිටියේ මෙම සිද්ධියෙන් තම නිවසේ සියලු බඩු මුට්ටු සහ ඇඳුම් පැළදුම් මෙන්ම දරු දෙදෙනාගේ පොත්පත් ද විනාශ වී ඇති බවය.

තමන් මෙරට ඡන්ද හිමි අයවලුන් නොවන අතර කිසිදු දේශපාලන පක්ෂයකට වැඩ නොකළ බවත්, නිවෙසට ගිනි තබා බඩුමුට්ටු කොල්ලකෑම සිදුකළේ කුමන පදනමක් මත දැයි තමන්ට ගැටලුවක් බවත් එම ජර්මන් ජාතික කාන්තාව සදහන් කළාය.

තම දරුවන් දෙදෙනා මේ වන විට අඩා වැටෙන්නේ ඔවුන්ගේ පොත්පත් ඉල්ලමින් බවත්, තම දරුවන්ගේ මෙන්ම තමන්ගේ යට ඇදුම්පවා රැගෙන ගොස් ඇති මොවුන් සිදුකර ඇත්තේ අරගලයක් දැයි ඔවුන් ප්‍රශ්න කළහ.

අරගලයක් වෙනුවෙන් තම නිවසේ බඩු මුට්ටු මෙන්ම දරුවන්ගේ පොත්පත් රැගෙන ගියේ මන්දැයි ප්‍රශ්න කළ එම ජර්මන් ජාතික යුවළ වැඩිදුරටත් සදහන් කර සිටියේ, තමන් මේ රටට ආදරය කරනබවත්, කිසිදු අවස්ථාවක මේ රට දමා නොයන බවත්, අරගල ලෙසින් නියමාකාරයෙන් සිදුකරන උද්ඝෝෂණ සදහා තමන්ද සහයෝගය දක්වන බවත්ය.

අප මේ සම්බන්ධයෙන් මීගමුව පොලීසියෙන් කළ විමසීමකදී එහි ජ්‍යෙෂ්ඨ නිලධාරියෙක් සදහන් කර සිටියේ මෙම ජර්මන් ජාතික යුවළ එම නිවසේ කුලී පදනම මත ජීවත්ව සිටි අයවලුන් වන බවය. එසේම, කිසියම් පිරිසක් විසින් ඉකුත් 09 වැනිදා එම නිවසට ගිනිතබා එහි තිබූ බඩුමුට්ටු මංකොල්ල කා පලා ගොස් ඇතැයි ද එම නිලධාරීයා වැඩිදුරටත් පැවසීය.