(නිමල කොඩිතුවක්කු)
අධිතාක්ෂණික යතුරුපැදි  ලියාපදිංචියට සහ ඒවාට සරිලන වෙනස්කම් කිරීමට ඉඩ ලබාදෙන ලෙසට රජයෙන් ඉල්ලා සිටින බව සමස්ත ලංකා යතුරුපැදිකරුවන්ගේ සංගමයේ සභාපති චිරන්ත අමරසිංහ මහතා අද (02)  කොළඹදී  පැවසීය.

ලියාපදිංචි කිරීමේ නිසි ක‍්‍රමවේදයක් නොමැතිව දිවයිනේ සියලූම පොලිස් ස්ථාන වල එම යතුරුපැදි ගොඩ ගසා ඇති බවත් මේ සම්බන්ධයෙන් මෝටර් රථ ප‍්‍රවාහන දෙපාර්තමේන්තුවෙන් විමසා සිටියද ඔවුන් එයට කිසිදු ප‍්‍රතිචාරයක් දක්වා නොමැති බවත් ඔහු කියා සිටියේය.

මරදාන පිහිටි සමාජ හා සමයික කේන්ද්‍රයේ අද (02) පැවති මාධ්‍ය හමුවකට එක්වෙමින් ඒ මහතා මේ බව පැවසීය.  එහිදී වැඩිදුරටත් අදහස් දැක්වූ චිරන්ත අමරසිංහ මහතා මෙසේද කීය.

     ‘‘ තොරතුරු දැනගැනීමේ පනත යටතේ මෙම යතුරුපැදි ලියාපදිංචි කරන ක‍්‍රමවේදය සම්බන්ධයෙන් අප විමසා සිටියා. එයට කිසිදු යහපත් ප‍්‍රතිචාරයක් මෙතෙක් ලැබිලා නැහැ.
වාහන, සයිලන්සර් සදහා ඇති ශබ්ද සීමාවන් සදහන් ගැසට් නිවේදනයක් හෝ කිසිදු නියෝගයක් නැහැ. එසේ තිබියදී වෙසක් කාළයේදී පමනක් සයිලන්සර් වල ශබ්දය හේතුවෙන් පොලිස් භාරයට ගෙන ඇති යතුරුපැදි 1083ක් සම්බන්ධයෙන් අප සංගමයට තොරතුරු ලැබී තිබෙනවා.


දුප්පත් මිනිස්සු තමයි යතුරු පැදි වැඩි වශයෙන් භාවිතා කරන්නේ. සුලූ වැරදි හේතුවෙන් යතුරුපැදි විශාල ප‍්‍රමාණයෙන් ඉතා දීර්ඝ කාළයක් තිස්සේ දිවයිනේ විවිධ පොලිස් ස්ථාන වල රඳවා තබා සිටිනවා. පොලීසියේ මේ වැඩ වලින් අපහසු තාවයට පත්වන්නෙත් වත්මන් රජයයි.


අධිතාක්ෂණික යතුරුපැදි මගින් සිදුවන අනතුරු අවමයි. ඒ වගේම ඒවාට සරිලන ලෙස සකස් කල උපකරණ මගින් ඒවා මාර්ගයේ පැහැදිලිව දිස් වෙනවා. ඒ මගින් සිදුවන අනතුරු ප‍්‍රමාණය අවම වෙනවා.


මේ කිසිදෙයක් ගැන සොයා බලන්නේ නැති පොලීසිය වසර අවසානයට සංඛ්‍යා දත්ත ඉදිරිපත් කරනවා අච්චර මැරුණා. මෙච්චර මැරුණා කියලා.

අපි පොලිස්පතිතුමා ඇතුලූ පොලීසියට අභියෝග කරනවා පුළුවන්නම් මේ ගැන කථා කරන්න අපිත් එක්ක ප‍්‍රසිද්ධ විවාදයකට එන්න කියලා යනුවෙන්ද ඔහු කියා සිටියේය.
මෙම අවස්ථාව සදහා ලංකා ස්වයං රැකියා වෘත්තකයන්ගේ ජාතික ත‍්‍රිරෝද රථ සම්මේලනයේ සභාපති සුනිල් ජයවර්ධන මහතා ඇතුලූ පිරිසක්ද එක්විය.