( චමිල් රූපසිංහ)
 
ඇසළ පෙරහර නැරඹීම සදහා පැමිණෙන සැදැහැවතුන් කිසිදු සැකයක් බියක් ඇති කරගත යුතු නැතැයි  ආරක්ෂක ලේකම් ජෙනරාල් ශාන්ත කෝට්ටේගොඩ මහතා පවසයි.
 
ආරක්ෂක ලේකම් ජෙනරල් ශාන්ත කෝට්ටේගොඩ මහතා අද  (04) මහනුවරට පැමිණ දළඳා වහන්සේ වැද පුදා ආශිර්වාද ගෙන මහනුවර ඇසළ පෙරහර මංගල්‍යයේ ආරක්ෂක කටයුතු සාකච්ඡා කිරීම වෙනුවෙන් ආරක්ෂක ප්‍රධානීන්ගේ සහභාගිත්වයෙන් ශ්‍රී දළදා මාලගාවේදී පැවැති රැස්වීමකදී ආරක්ෂක ලේකම්වරයා මේ බව ප්‍රකාශ කළේය.
 
 දළඳා පෙරහැර නැරඹීම සදහා දේශිය බැතිමතුන් මෙන්ම  විදේශිය සංචාරකයන්  ද බහුලව පැමිනෙන බවත් මෙහි ආරක්ෂාව සදහා ජනාධිපති අග්‍රාමාත්‍ය තුමාගේ උපදෙස් මත ත්‍රිවිද හමුදාව ඇතුලු ආරක්ෂක අංශ ආරක්ෂාව සදහා යොදවා ඇති අතර ඒ සදහා ජනතාවගේද නොමසුරු සහයෝගය ආරක්ෂක අංශ වලට ලබා දිය යුතු බවද ආරක්ෂක ලේකම්වරයා පැවසිය.
 
ඇමරිකානු තානාපති කාර්යාලය මගින් ආරක්ෂාව සම්බන්ධයෙන් කළ අවවාදාත්මක නිවේදනය දීර්ඝ නිවාඩුවක් හෝ උත්සව අවස්ථාවක් පවතින මොහොතක එරට සංචාරකයින්ට සාමාන්‍යයෙන්  නිකුත් කරන ලියවිල්ලක් මිස එය ශ්‍රීලංකාව මූලික කරගනිමින් නිකුත් කරන ලද්දක් නොවන බව එම  තානාපති කාර්යාලය මගින් දැනුම් දුන්නේ යැයි ද සමාජ මාධ්‍යය මගින් මෙම නිවේදනය ප්‍රචාරය කිරීමත් සමඟ මෙරට ආරක්ෂාව සම්බන්ධයෙන් ගැටලුවක් හා තර්ජනයක් පවතින බවට ජනතාව තුළ යම් සැකයක් ඇතිවූ බවත් මේ නිසා එය නිකුත් කළ පාර්ශවයෙන් කරුණු විමසා අදාළ තොරතුරු තහවුරු කරගත්  බව ආරක්ෂක ලේකම්වරයා පැවැසිය.
 
 මෙරට ආරක්ෂාව උපරිමයෙන් සහතික කිරීමට ආරක්ෂක අංශ මේවන විට පියවර ගෙන තිබෙන බවත් මෙම නිවේදනය ඇමරිකානු තානාපති කාර්යාලය මගින් සාමාන්‍යයෙන් වරින් වර නිකුත් කරනු ලබන එකක් වුවත් ඒ ගැන ආරක්ෂක අංශ ඉතා සැලකිල්ලෙන් කරුණු සොයා බැලූ බවද ආරක්ෂක ලේකම්වරයා සදහන් කළේය.
 
 මේ ආකාර නිවේදන සුළුවෙන් තකා බැහැර කිරීමට ආරක්ෂක අංශ කිසිවිටෙකත් කටයුතු නොකරන බවද ආරක්ෂක ඇමැතිවරයා ලෙස ජනපති තුමන්ද මේ පුවත ගැන තමන් ගෙන් විමසූ බවත් ජනතා ආරක්ෂාව තහවුරු කිරීම පිණිස උපරිමයෙන් කටයුතු කරන ලෙස දැනුම් දුන් බවද ආරක්ෂක ලේකම් ජෙනරල් ශාන්ත කෝට්ටේගොඩ මහතා සදහන් කළේය.