(දසුන්  රාජපක්ෂ) 

දේශපාලන පළිගැනීම්වලට ලක්වූවන්  පිළිබඳ විමර්ශනය කරන ජනාධිපති කොමිෂන් සභාව වෙත පැමිණිලි බාර ගැනීම හෙට (20) දිනයෙන් පසු අවසන් කරන බව එම කොමිසමේ ප්‍රකාශකයෙක් සඳහන් කළේය.

මේ වන විට කොමිසමට පැමිණිලි 305ක් ලැබී තිබෙන බවද එම ප්‍රකාශකයා කියා සිටියේය.

පැමිණිලි සම්බන්ධයෙන් ජනාධිපති කොමිසමේ විශේෂ පොලිස් ඒකකය මගින් මූලික විමර්ශනයන් සිදුකරමින් පවතින අතර විමර්ශන අවසන් කර පැමිණිලි කිහිපයක් සම්බන්ධයෙන්  කොමිසම හමුවේ සාක්ෂි ලබා ගැනීමේ කටයුතු මේ වන විට ආරම්භ වී ඇත.

ඒ අනුව ජනාධිපති කොමිසම හමුවේ මේ වන විට  හිටපු නාවික හමුදාපති අද්මිරාල් වසන්ත කරන්නාගොඩ සහ රියර් අද්මිරාල් ඩී.කේ.පී.දසනායක යන මහත්වරුන් සාක්ෂි ලබාදී ඇත. 

මෙම කොමිසම වෙත පැමිණිලි බාර ගන්නා දිනය දීර්ඝ කිරීමක් සිදු නොකරන බව ද කොමිසමේ ප්‍රකාශකයා වැඩිදුරටත් කියා සිටියේය.