(මුදිතා දයානන්ද)

පළාත් පාලන මැතිවරණය සම්බන්ධයෙන් වැරදි ගැසට් පත‍්‍රයක් නිකුත් කළ, ජනතාවගේ ඡන්ද අයිතිය උදුරා ගැනීමට කටයුතු කළ ෆයසිර් මුස්තාපා අමාත්‍යවරයාට එරෙහිව විශ්වාසභංගයක් ගෙන ඒමට ජනතා විමුක්ති පෙරමුණ ඉදිරියේදි කටයුතු කරන බව එහි ප‍්‍රචාරක ලේකම් පාර්ලිමේන්තු මන්ත‍්‍රී විජිත හේරත් මහතා පවසයි.

පැලවත්ත, ජනතා විමුක්ති පෙරමුණ කාර්යාලයේදි අද (23) පැවති මාධ්‍ය හමුවකදී ඒ මහතා මේ බව කීය.
“පළාත් පාලන මැතිවරණයේ ගැසට් එක නිකුත් කළේ පෙබරවාරි මාසයේදි. එයට එරෙහිව නඩුවක් ගොනු කළේ නොවැම්බරයේදි. මේකට මාස නවයක්ම ගත වුණේ ඇයි? සීමා නිර්ණ අභියාචනා කමිටුවේ කාර්ය භාරය ඔවුන්ගේ සීමා දන්නේ ඇමතිවරයායි. ඒ නිසා ගැසට් පත‍්‍රය නිකුත් කිරිමට පෙර ජනාධිපති නීතිඥයෙක් වන ෆයසිර් මුස්තාපා ඇමතිවරයාට එහි තිබෙන අඩුපාඩු පෙනිය යුතුව තිබුණා. එසේ නොකළේම මැතිවරණ්‍ය කල්දැමීමේ කුමන්ත‍්‍රණය දියත් කිරිමේ අවශ්‍යතාවයෙන්.

ගැසට් පත‍්‍රයේ මේ කියන දුර්වලතා හිල් දන්නේ ඔහුම පමණයි. සාමාන්‍ය ජනතාවට ඒවා ගැන අවබෝධයක් නැහැ. ඒනිසා ආණ්ඩුවේ අවශ්‍යතාවය වෙනුවෙන් මේ නඩු පැවරූ අයට අවශ්‍ය තුරුම්පු ලබාදුන්නේ ඇමතිවරයාම බව අපේ විශ්වාසයයි. මේ ගැසට්ටුව නිකුත් කළ කාලයේම නඩුව පවරන්නේ නැතිව මෙතෙක් කාලයක් තියාගෙන හිටියේ මැතිවරණය ප‍්‍රකාශයට පත් කරන තුරුයි. එයින් මැතිවරණය කල්දැමීමටයි මේ උත්සාහ කරන්නේ. ඒ නිසා ඔහු තවදුරටත් මේ ඇමතිධුරය දැරීමට සුදුසු නැහැ. වාහම ඔහු ඉවත් කළ යුතුයි. නමුත් ඔහු ඉටු කරන්නේ ජනාධීපතිද ඇතුලූ ශ්‍රී ලංකා නිදහස් පක්ෂයේ උවමනාව නිසා ජනාධිපතිවරයා ඔහුව ඉවත් කරන්නේ නැහැ. ඒ නිසා අපි ඔහුට එරෙහිව විශ්වාසභංගයක් ගෙන එනවා.“යැයි ද ඒ මහතා ප්‍රකාශ කරයි.