(විනීතා එම් ගමගේ)

ජාතික හෙළ උරුමය පිළිගන්නේ ව්‍යවස්ථාවේ ඇති ඒකීයභාවය යන වචනය නොව එහි ඇති අරුතයැයි ජාතික හෙළ උරුමය මහ ලේකම්, මහා නගර හා බස්නාහිර සංවර්ධන අමාත්‍ය පාඨලි චම්පික රණවක මහතා ප‍්‍රකාශ කළේය.   

ඒකීය භාවය යන්නෙන් තම පක්ෂය අදහස් කරන්නේ රටේ මූලික නීතිය තැනීම කළයුත්තේ එක ආයතනයකින් පමණක් බව යැයි ද හෙතෙම සඳහන් කළේය.

වෙනත් ආයතන ගණනාවකට නීති හැදීමේ බලය ව්‍යවස්ථාවෙන්ම දී ඇත්නම් ඒකිය වීමෙන් පළක් නැතැයි ද අමාත්‍යවරයා පැවැසීය.

ඒකීයභාවය යන්න හෙළ උරුමය පිළි අරගෙන නේදැයි බොහෝ දෙනා විමසන  බවත් තම පක්ෂය ඒකීය භාවය යන්නෙන් අදහස් කරන තත්ත්වය ව්‍යවස්ථා යෝජනාවල ඇති බැවින් එය පිළි ගත් බවත් රණවක මහතා කීය.

පවතින ව්‍යවස්ථාවේ 2, 4ආ සහ 76 යන වගන්ති තුනෙන්ම ඒකීය භාවය යන්න කුමක් දැයි අර්ථ ගැන්වෙන බව පැවැසු අමාත්‍යවරයා එහි අරුත රටේ නීතිය තැනීම අයත් වන්නේ එක ආයතනයකට බව ද පදරුත් අනුවම එය පිළිගත යුතු බව ද ඔහු තව දුරටත් කීය.