(නිමන්ති රණසිංහ)
 
 ශ්‍රී ලංකා රතු කුරුස සංවිධානය   ”සිරිලිය සවිය” වැඩසටහනට ලබාදී තිබූ අංක WPKA 0642 දරන ඩිෆෙන්ඩර් රථය මියගිය රගර් ක්‍රීඩක මොහොමඞ් වසීම් තාජුඞීන් නැමැත්තාගේ ඝාතන සිද්ධියට අදාළ නඩුවේ නඩු භාණ්ඩයක් වශයෙන් ඇතුළත් කිරීමට කොළඹ ප්‍රධාන මහේස්ත්‍රාත්  රංග දිසානායක මහතා අද අපරාධ පරික්ෂණ දෙපාර්තමේන්තුව වෙත අවසර ලබා දුන්නේය.
 
එසේම, එම ඩිෆෙන්ඩර් රථය කොළඹ මහේස්ත‍්‍රාත් අධිකරණ අංක තුන අධිකරණයේ විභාග වන අංක බී/849/13/12 නඩුවට අදාළව නඩු භාණ්ඩයක් ලෙස ලේඛන ගත කිරීමටද මහේස්ත‍්‍රාත්වරයා අධිකරණ ලේඛනාගාරයට නියෝග කළේය.
 
ඝාතනයට ලක්වූ මොහොමඞ් වසීම් තාජුඞීන්   පැහැරගෙන යාමට මෙම ඩිෆෙන්ඩර් රථය යොදා ගෙන ඇති බවට සාධාරණ සැකයක් පවතින බැවින් එම රථය අදාළ නඩුවේ නඩු භාණ්ඩයක් වශයෙන් නම් කරන ලෙසට අපරාධ පරීක්ෂණ දෙපාර්තමේන්තුව අද අධිකරණයෙන් කළ ඉල්ලීමක් සැලකිල්ලට ගත් මහේස්ත‍්‍රාත්වරයා මෙම නියෝගය නිකුත් කළේය.