(ජයරත්න විල්ලර)

සයිටම් ආයතනයේ විධායක නිලධාරී වෛද්‍ය සමීර සේනාරත්න මහතාට වෙඩි තැබීමේ සිද්ධිය නිර්මාණය කළේ තමන් බව කියමින් අධිකරණයට භාරවීමට පැමිණි හිටපු ප‍්‍රාදේශීය දේශපාලනඥයකු ඇතුළු දෙදෙනකු රිමාන්ඩ් භාරයට පත් කිරීමට තමන්ට අධිකරණමය බලයක් නැති බව සඳහන් කරමින් තුල්හිරිය මහේස්ත‍්‍රාත් යූ. සුහුදුරුගොඩ මහතා ඔවුන් දෙදෙනා අධිකරණය භාරයට ගැනීම ප‍්‍රතික්ෂේප කළේය.

නීතිඥවරුන් මාර්ගයෙන් අධිකරණයට භාරවීමට පැමිණි කඩුවෙල ප‍්‍රාදේශීය සභාවේ (එජනිස) හිටපු මන්තී‍්‍රවරයකු වන අරුණ ලක්මාල් තුෂාර (41) සහ කඩුවෙල ගෝනගම පදිංචි සුනිල් උදය කුමාර (42) නමැත්තන් අධිකරණය භාරයට ගැනීම ප‍්‍රතික්ෂේප කරමින් මෙලෙස ආපසු හරවා යවනු ලැබූහ.

මෙම පුද්ගලයන් දෙදෙනා නීතිඥවරුන් මාර්ගයෙන් අධිකරණයට පැමිණි අතර නීතිඥවරු මෙම දෙදෙනා මහේස්ත‍්‍රාත්වරයා හමුවට ඉදිරිපත් කළහ.

නීතිඥවරු අධිකරණය අමතමින් තම සේවාදායකයන් අද මෙම උසාවියට පැමිණියේ අධිකරණය භාරවීමට බව දැනුම් දුන්හ.

සයිටම් ආයතනයේ විධායක නිලධාරි වෛද්‍ය සමීර සේනාරත්න මහතාට වෙඞී තැබීමේ සිද්ධිය සැලසුම් කළ බවට ඔවුන් අත්අඩංගුවට ගැනීමට පොලිසියේ සූදානමක් ඇතැයිද ඒ හේතුව නිසා ඔවුන් වරකාපොළ දොරවක ප‍්‍රදේශයේ මිතුරෙකුගේ නිවෙසේ සැඟවී සිටියේ යැයිද දැනුම් දුන් නීතිඥවරු ඔවුන් දෙදෙනා රිමාන්ඞ් භාරයට පත් කරන ලෙස ඉල්ලා සිටියහ.

මෙම දෙදෙනා අධිකරණය භාරයට ගැනීමට තමන්ට අධිකරණමය බලයක් නොමැති බව පැහැදිලි කළ මහේස්ත‍්‍රාත්වරයා ඔවුන් දෙදෙනා රිමාන්ඞ් භාරයට පත් කිරීමට කළ ඉල්ලීම පිළිගැනීම ප‍්‍රතික්ෂේප කළේය.

ඒ අනුව එම දෙදෙනා සිය නීතිඥවරුන් සමඟ අධිකරණයෙන් පිටව ගියහ.