(කුෂාන් ජයවර්ධන)

කැකිරාව ඉපලෝගම ව්‍යාපාරිකයකු(38) ඉරිදා (09) පෙරවරුවේ සුදුපැහැති වෑන් රථයකින් හා කැබ්රථයකින් පැමිණී සන්නද්ද පිරිසක් විසින් පැහැරගෙන යාමේ සිද්ධියක් ගැන පරීක්ෂණ ඇරඹූ බව ඉපලෝගම පොලිසිය කියයි. උදෑසන 7ට පමණ ආයුධ සන්නද්ධ පිරිසක් සුදුපැහැති වෑන් රථයකින් තම නිවසට පැමිණී බව පැහැරගැනීමට ලක්වූ බව කියන පුද්ගලයාගේ බිරිය පවසයි. 

පැමිණී පිරිස පැය භාගයක පමණ කාලයක් තම සැමියා සමග කතාකරමින් සිටි බවත් ඔවුන් බණ්ඩාරවෙල පොලිසියේ යැයි පැවසූ බවත් ඇය පවසයි. පසුව වෙනත් ප‍්‍රදේශයක නිවසක් පෙන්වීම සදහා යන බව පවසමින් පැමිණී පිරිස තම සැමියා සුදුවෑන් රථයේ නංවාගෙන ගිය බව ද පැහැරගැනීමට ලක්වූ පුද්ගලයාගේ බිරිය පවසයි.

ඒ සමග පැමිණී තවත් දෙදෙනකු තම නිවසේ තිබූ ආරක්ෂක කැමරා පද්ධතියේ මතක ගබඩාවද රැගෙන ගිය බව ද ඇය කියයි. සැමියා ගැන විමසිමට බණ්ඩාරවෙල පොලිස් ස්ථානයට ගිය බවත් එහිදී තම සැමියා රැගෙන ගිය බවට තොරතුරක් අනාවරණය නොවූ බවත් ඇය පවසයි.

පොලිස් සොකෝ හා ඇගිලි සළකුනු ඒකකය ද  පරීක්ෂණ සඳහා සහය දක්වයි.