(ඩයනා උදයංගනී)
 
ඉදිරි දිනවලදී ගිගුරුම් සහිත වැසි සමඟ අකුණු අනතුරු ඇතිවීමේ අවධානමක් පවතින බව කාලගුණ විද්‍යා දෙපාර්තමේන්තුව පවසයි.

 
විශේෂයෙන් මෙම මස 16 වැනිදා පමණ තෙක් දිවයිනේ බොහෝ පළාත්වල සවස් කාලයේදී ගිගුරුම් සහිත වැසි ඇතිවන අතර ඒ අවස්ථාවලදී අකුණු අනතුරු වළක්වා ගැනීම සඳහා ආරක්‍ෂිත පියවර අනුගමනය කරන ලෙස කාලගුණ විද්‍යා දෙපාර්තමේන්තුව ජනතාවට දැනුම්දෙයි.
 
ගිගුරුම් සහිත වැසි ඇතිවන අවස්ථාවල ප්‍රබල අකුණු සමඟ පැයට කිලෝමීටර 70 - 80 පමණ වන කෙටි කාලීන තද සුළං ඇතිවිය හැකි බව එම දෙපාර්තමේන්තුවේ ප්‍රකාශකයෙක් පැවසීය.
 
එබැවින් ගිගුරුම් සහිත වැසි ඇතිවන අවස්ථාවලදී එළිමහනේ හෝ ගස් යට රැඳී නොසිට ආරක්‍ෂිත ගොඩනැගිල්ලක හෝ සවෘත වාහනයක් තුළ රැඳී සිටින ලෙසත්, කුඹුරු, තේ වතු, ක්‍රීඩා පිටි, ජලාශ වැනි විවෘත ස්ථානවල නොසිටින ලෙසත්, රැහැන් සහිත දුරකථන සහ විදුලියට සම්බන්ධ කළ උපකරණ භාවිතයෙන් හා බයිසිකල්, ට්‍රැක්ටර්, බෝට්ටු වැනි විවෘත වාහනවල ගමන් කිරීමෙන් ද වැළකී සිටින ලෙසත් ජනතාවට දැනුම්දීමක් කරන බව ඔහු සඳහන් කළේය.