(ජුඩ් සමන්ත)


වැසි සහිත කාලගුණික තත්ත්වය හේතුවෙන් පුත්තලම දිස්ත්‍රික්කයේ පවුල් 1486 ක පුද්ගලයින් 5862 ක් අවතැන් වී සිටින බව පුත්තලම ආපදා කළමනාකරණ ඒකකය සඳහන් කරයි.


ප්‍රදේශයේ ලොකු කුඩා වැව් සියල්ල මේ වන විට පිරී ගොස් අවසන් වී ඇත.


කඩුපිටිඔය පිටාර ගැලීම හේතුවෙන් හලාවත - කොළඹ මාර්ගය මාදම්පේ සහ මහවැව ප්‍රදේශ ජලයෙන් යටවී ඇත. මෙම මාර්ගයේ බර වාහන පමණක් ගමන් කරන අතර,සැහැල්ලු වාහන සහ යතුරුපැදි ගමන් කිරීම අනතුරු දායක බව පොලීසිය සදහන් කරයි.


කටුපත වැව පිටාර ගැලීමත් සමඟ මහාමාඑළිය වැව් බැම්ම කැඩී යාමත් සමඟ පුත්තලම - හලාවත මාර්ගය බත්තුළුඔය ප්‍රදේශයෙන් ජලයෙන් යටවී ඇත.


රතඹලාඔය පිටාර ගැලීම හේතුවෙන් ආණමඩුව - හලාවත මාර්ගය සේරුකැලේ ප්‍රදේශයෙන් ජලයෙන් යටවී ඇති අතර, මදවක්කුලම ගම්මානයේ ස්ථාන කීපයක්ද ජලයෙන් යටවී ඇත. මදවක්කුලම ගම්මානයේ කිරි ගවයින් විශාල පිරිසක් ජලයට ගසා ගොස් ඇති බව ගම්වැසියෝ පවසති.


කලාඔයේ ජල මට්ටම ඉහළ යාම නිසා පුත්තලම - මන්නාරම මාර්ගයේ ගමනාගමන කටයුතු ඇණ හිට ඇත. එළුවන්කුලම සපත්තු පාලමෙන් අඩි 3 ½ ක පමණ ජලයක් ගලා යන බව නාවුක හමුදාව සඳහන් කළේය.


තබ්බෝව ජලාශයේ ජල මට්ටම අඩි 16 යි අගල් 03 ක් දක්වා ඉහළ නැග ඇත. එහි වාන් මට්ටම වන්නේ අඩි 17 ½ ක් බව වාරි මාර්ග දෙපාර්තමේන්තුව කියයි. රාජාංගනය ජලාශයේ වාන් මට්ටම අඩි 34 ½ ක් වන අතර,මේ වන විට ජලය අඩි 33 දක්වා ඉහළ ගොස් ඇත. 


දැදුරුඔය ජලාශයේ වාන් දොරටු 8 ක් අඩි 1 බැගින් විවෘත කර ඇත. ඉන් තත්ත්පරයට ජලය ඝන අඩි 25000 ක් දැදුරු ඔයට මුදා හැරේ. මෙම තත්ත්වය නිසා දැදුරු ඔයද පිටාර ගලන්නට පටන් ගෙන ඇත.
 
මේ අතර,මුහුද රළු වීම හේතුවෙන් මහවැව ප්‍රදේශීය ලේකම් කොට්ඨාසයේ කුඩාමඩු වැල්ල මුහුදු තීරය සහ ආරච්චිකට්ටුව ප්‍රාදේශීය ලේකම් කොට්ඨාසයේ කරුකුපනේ වෙරළටද හානි සිදු වී ඇත.