ඩයනා උදයංගනී

 
දැනට පවතින දැඩි වියළි කාලගුණ තත්ත්වයේ මද වෙනසක් ඇතිකරමින් දිවයිනේ පළාත් කිහිපයකට අද (9) හෙට (10) සහ අනිද්දා (11) දිනවල සවස් කාලයේ තරමක තද වැසි ඇතිවන බව කාලගුණ විද්‍යා දෙපාර්තමේන්තුව පවසයි.
 
වැසි ඇතිවීම සඳහා හිතකර වායුගෝලීය තත්ත්වයක් මේ වන විට ඇතිවෙමින් පවතින අතර, ඒ අනුව උතුර, උතුරු මැද, නැගෙනහිර, ඌව සහ මධ්‍යම පළාත්වල සවස 2.00න් පසු වැසිත්  උතුරු පළාත්වල තැනින් තැන වැසි හෝ ගිගුරුම් සහිත වැසිත් ඇති වන බව කාලගුණ විද්‍යා දෙපාර්තමේන්තුවේ කාර්යයේ නියුතු කාලගුණ විද්‍යාඥ කසුන් පැස්කුවෙල් මහතා ලංකාදීපයට පැවසීය.
 
උතුරු, උතුරු මැද සහ නැගෙනහිර පළාත්වල හා මාතලේ දිස්ත‍්‍රික්කයේ සමහර ස්ථානයන්හි මිලිමීටර 50ට වැඩි තරමක තද වැසි ඇතිවිය හැකි බව ද ඔහු ස`දහන් කළේය.
 
ගිගුරුම් සහිත වැසි ඇතිවන අවස්ථාවල තාවකාලික තද සුළං, අකුණු අනතුරුද ඇතිවිය හැකි බැවින් අනතුරු අවම කරගැනීමට ක‍්‍රියාකරන්නැයි ද කාලගුණ විද්‍යා දෙපාර්තමේන්තුව ජනතාවට දැනුම්දීමක් කරයි.
 
එමෙන්ම සමහර ප‍්‍රදේශවලට අයිස් වැසි ඇතිවීමේ සුළු හැකියාවක් පවතින බව ද කාර්යයේ නියුතු කාලගුණ විද්‍යාඥවරයා කීවේය.
 
අන්තර් මෝසම ද මෙම මස අවසාන සතියේදී පමණ සක‍්‍රීයවනු ඇතැයි අපේක්‍ෂා කරන බව කී කසුන් පැස්කුවල් මහතා ඉන්පසු දිවයින පුරා වැසි ඇතිවන බව ද කියා සිටියේය.