(කේ බුද්ධික කුමාරසිරි)

බලපත‍්‍ර රහිතව විදේශ අධ්‍යාපනය ලබා දීමේ ආයතනයක් පවත්වාගෙන ගෙන ගිය බව කියන කෝටිපති ව්‍යාපාරිකයකු අද (22) අත්අඩංගුවට ගත් බව කොල්ලුපිටිය පොලිසිය කියයි.

ආගමන විගමන පාලකවරයාගේ අවසරයකින් තොරව විදේශ ගමන් බලපත් ඔහු තම සන්තකයේ තබාගෙන එම ආයතනය පවත්වාගෙන ගොස් ඇතැයි ද පොලිසිය පවසයි.

මුදල් වංචා කිරීමේ සිද්ධීන් ගණනාවක් පිළිබඳව ලැබුණු පැමිණිලි රැසක් හේතුවෙන් කොළඹ කොටුව මහේස්ත්‍රාත් අධිකරණයෙන් ලබා ගත් සෝදිසි වරෙන්තුවක් මත මෙම වැටලීම කළ බවද පොලිසිය කියයි.

මෙම ආයතනය මගින් විදෙස් අධ්‍යාපන අවස්ථා සහ රැකියා අවස්ථා ලබා දෙන බව පවසමින් විවිධ විද්‍යුත් සහ මුද්‍රිත මාධ්‍ය ඔස්සේ ප‍්‍රචාරක කටයුතු කරමින් රුපියල් ලක්ෂ දෙදහසකට ආසන්න මුදලක් වංචා කර ඇති බවට පැමිණිලි ලැබුණු බව ද පොලිසිය ප්‍රකාශ කරයි.

ඒ අනුව කොල්ලූපිටිය පොලිසිය  විදේශ සේවා නියුක්ති කාර්යංශයේ වැටලීම් ඒකකය සහ කොළඹ විශ්ව විද්‍යාලයේ පරිගණක ඉංජිනේරු නිලධාරීන් හා එක්ව මෙම වැටලීම කර තිබේ.

එහිදී මෙවැනි ආයතනයක් පවත්වාගෙන යාම සදහා සැකකරුට කිසිදු බලපත‍්‍රයක් නොතිබූ බවත් සැකකරු සන්තකයේ පුද්ගලයින් රැසකගේ විදේශ ගමන් බලපත‍්‍ර රාශියක් තිබූ බවත් පොලිසිය පවසයි.