(ශාන්ත කුලරත්න,බිමල් ශ්‍යාමන් ජයසිංහ)

අඹතලේ ප්‍රදේශයේ විදුලිබිල නොගෙවු ටයර් අලෙවිසලක විදුලිය විසන්ධි කිරීමට ගිය බව කියන ශ්‍රී ජයවර්ධනපුර විදුලි ඉංජිනේරු කාර්යාලයේ සේවකයින් දෙදෙනකුට එම අලෙවිසලේ හිමිකරු පහර දුන්නැයි විරෝධය පළකරමින් ශ්‍රී ජයවර්ධනපුර විදුලි ඉංජිනේරු කාර්යාලයේ සේවකයෝ පිරිසක් අද (20) එම කාර්යාලය ඉදිරිපිට උද්ඝෝෂණයක් පැවැත්වූහ.

එම සිද්ධීයට සම්බන්ධ කිසිවකුත් අත්අඩංගුවට ගෙන නැතැයි ද විරෝධතාකරුවො පැවසූහ.

ඊට සහාය දෙමින් හෝමාගම,හොරණ බණ්ඩාරගම හා අවිස්සාවේල්ල විදුලි ඉංජිනේරු කාර්යාලවල බිඳ වැටුම් අංශයද අද දහවල් 12 සිට සේවාවන්ගෙන් ඉවත් වී තිබිණි.

එම සේවකයන්ට පහර දුන් බව කියන ටයර් වෙළෙඳසලේ හිමිකරු නුගේගොඩ ගංගොඩවිල ප්‍රදේශයේ සැඟව සිටියදී  අත්අඩංගුවට ගත් බව මිරිහාන විශේෂ අපරාධ මෙහෙයුම් ඒකකය කියයි.

සැකකරු හෙට (21) නුගේගොඩ අධිකරණයට ඉදිරිපත් කිරීමට නියමිතය.