(රංජිත් කරුණාවිර)

ප්‍රමාද වී  සිය ගමන් වාරය අරඹන්නැයි  ලංගම බස් රියක රියදුරුට හා කොන්දොස්තරවරයාට තර්ජනය කරමින්  පෞද්ගලික බසයක හිමිකරුවකු ඇතුලු පිරිසක් පොලු මුගුරු රැගෙන ඔවුනට මරණිය තර්ජනය කළහ. 

හසලක ඩිපෝවට අයත් රංදෙනිගල සිට හසලක කොලොන්ගොඩ දක්වා උදැසන 6.00ට දිවෙන පාසැල් බස් රථය එම ගමන් මාර්ගයේ ගමන් ගන්නා පෞද්ගලික බස් රථ හිමි කරුවෙකු මිනිපේ 06 කණුව ප්‍රදේශයේදී  මාර්ගය හරස් කර පොලු මුගුරු සහිතව පැමිණ  ලංගම බස් රථයේ රියදුරුට හා කොන්දොස්තරවරයා ට ප්‍රමාද වි පැමිණෙන  ලෙස මරණිය තර්ජනය කරන අයුරු   වීඩියෝ පටයකද දැක්වේ.

එම වීඩියෝව ලංගම බසයේ සිටි මගියෙකු විසින් සිය ජංගම දුරකථනයෙන් විඩියෝ කර ඇත.  එම විඩියෝවෙන් දැක්වෙනුයේ  ලංගම  බසයේ  ගමන් මග අහුරා ඉදිරියෙන් යන පෞද්ගලික බසය  ලංගම බසයට ගමන් කිරිමට අපහසු වන අයුරින් ගමන් කරනා අයුරුය.

මෙම මරණ තර්ජන පිළිබද  ලංගම බස් රථයේ රියදුරු හා කොන්දොස්තරවරයා පසුගිය සිකුරාදා (10) හසලක පොලිසිය වෙත පැමිණිල්ලක්ද කර තිබේ.

ඒ අනුව ඊයේ  (13) සැකකරුවන් හසලක පොලිස් නිළධාරින් විසින් අත් අඩංගුවට ගෙන  ඇති අතර ඔවුන් ඔ මහියංගණ මහේස්ත්‍රාත් අධිකරණය හමුවට ඉදිරිපත් කිරිමට නියමිතව ඇත.

අවස්ථා රැසකදී මෙම පෞද්ගලික බස් රථය හිමිකරුවන් ලංගම බස් රථ ගමන් මග අහුරා  රජයේ ලංගම සේවක මහතුන් හට පහරදීමට තැත් කිරිම්,  බැන වැදිම් පිළිබද හසලක පොලිසිය වෙත පැමිණිලි රැසක් ලැබී ඇති බවට පොලිස් ආරංචි මාර්ග සඳහන් කරයි.

ඉන් සිදුවීම්  කිහිපයක් සමත මණ්ඩලයේදී  සමතයකට පත්ව ඇති අතර, එසේ තිබි නැවත නැවත රජයේ සේවකයන්ගේ රාජකාරියට අවහිර වන ලෙස බැනවැදීම්, මරණ තර්ජනය කිරිම් අඩුවක් නොමැති බවට හසලක ලංගම ඩිපෝවේ සේවකයෝ පවසති.

මෙම පෞද්ගලික බස් රථ හිමිකරුවාට බස් රථ කිහිපයක් ඇති අතර ඉන් 02ක්ම මාර්ග බලපත්‍ර රහිතව රංදෙනිගල මාර්ගයේ ධාවනය කරන බවත් රියදුරු බලපත්‍ර කොන්දොස්තර බලපත්‍ර නොමැතිව එම බස් රථ හිතු මතේ ධාවන කරන බවට හා ප්‍රවේශපත්‍ර නිකුත් නොකීරිම වැනි  චෝදනා රැසක් ඇති අතර මේ සම්බන්ධයෙන් මධ්‍යම පළාත් මාර්ගස්ථ මගි ප්‍රවාහන අධිකාරියේ නිළධාරීන් අවස්ථා රැසකදී දැනුවත් කළඳ කිසිදු  ප්‍රතිචාරයක් නොමැති බවට හසලක ලංගම ඩිපෝ නිළධාරිහු  පවසති.