(තරිඳු ජයවර්ධන සහ ටෝනි කරුණානායක)

පිරිසිදු පානීය ජලය ඉල්ලූ රතුපස්වල ජනතාවට වෙඩි තැබීමේ සිද්ධිය සම්බන්ධයෙන් රිමාන්ඩ් කර සිටින බ්‍රිගේඩියර් දේශප්‍රිය ගුණවර්ධන මහතා ඇතුළු සැකකරුවන් සිව් දෙනා ජූනි 14 තෙක් යළි රිමාන්ඩ් කරන ලෙස ගම්පහ ප්‍රධාන මහේස්ත්‍රාත් ඩී.ඒ රුවන් පතිරණ මහතා අද(31) නියෝග කළේය.

රහස් පොලිසියේ ප්‍රධාන පොලිස් පරීක්ෂක රංජිත් මුණසිංහ මහතා සහ උප පොලිස් පරීක්ෂක උපාලි බණ්ඩාර මහතා පැවසුවේ සැකකරුවන් අත්අඩංගුවට ගෙන  ඇත්තේ පුද්ගලයින් ඝාතනය කිරීමේ හා තවත් පුද්ගලයින් ඝාතනය කිරීමට උත්සාහ කිරීමේ චෝදනා මත බවයි.

තවමත් පරීක්ෂණ සිදුකරන බැවින් සැකකරුවන් ලබන 14 වැනි දා තෙක් රිමාන්ඩ් කරන ලෙස රහස් පොලිසිය ඉල්ලා සිටියේය.
අගතියට පත් පාර්ශවය වෙනුවෙන් නීතීඥ ලක්මාලි හේමචන්ද්‍ර මෙනවිය පෙනී සිටි අතර සැකකරුවන් වෙනුවෙන් පෙනී සිටි නීතීඥ නලින්ද ඉන්ද්‍රතිස්ස මහතා පැමිණ සිටියේ නැත.