(  නාලක සංජීව දහනායක -සුජිත් හේවාජූලිගේ)

රටේ ජාතික ආරක්‍ෂාව කඩාවැටී රාජ්‍ය නායකයන්ගේ ජීවිතවලට තර්ජන එල්ලවී තිබීම හා ඇතිවී තිබෙන ආර්ථික අර්බුධය සම්බන්ධයෙන් විශේෂ විවාදයක් පැවැත්වීම සඳහා ලබන සතියේදී වහාම පාර්ලිමේන්තුව කැඳවන ලෙසට ඒකාබද්ධ විපක්‍ෂය අද (26) කතානායකවරයාගෙන් ඉල්ලීමක් කර තිබේ.

රටතුළ දැඩි අර්බුධකාරී තත්ත්වයක් මතුව තිබෙන අවස්ථාවකදී සතිදෙකක කාලයක් පාර්ලිමේන්තුව රැස්නොවීම බරපතල බැවින් මෙම ඉල්ලීම කළ බව ඒකාබද්ධ විපක්‍ෂයේ නායක, පාර්ලිමේන්තු මන්ත‍්‍රී දිනේෂ් ගුණවර්ධන මහතා පැවසීය. 

එමෙන්ම පොලිස්පතිවරයාට එරෙහිව විශ්වාසභංග යෝජනාවක් ගෙන ඒම සඳහාද ඒකාබද්ධ විපක්‍ෂය මේ දිනවල සාකච්ඡාකරමින් සිටින බවත් පාර්ලිමේන්තුව කැඳවූ වහාම සෙසු දේශපාලන පක්‍ෂ සමඟද ඒ පිළිබඳව සාකච්ඡා කිරීමට බළාපොරොත්තුවන බවද මන්ත‍්‍රීවරයා කීය.

මේ අතර ජනාධිපති හා හිටපු ආරක්ෂක ලේකම් ඝාතන කුමන්ත්‍රණය, පොලිස්පති හා පොලිසියට එරෙහි චෝදනා සම්බන්ධයෙන්දයෙන්ද පාර්ලිමේන්තුවේ විවාදයක් පවත්වන්නැයි කතානායකවරයාගේ ඉල්ලීමට ඒකාබද්ධ විපක්ෂය ප්‍රධාන විපක්ෂය සහ  දේශපාලන පක්ෂ කිහිපයක නායකයෝ බලාපොරොත්තු වෙති.

මේ සම්බන්ධයෙන් අප ඒකාබද්ධ විපක්ෂය නියෝජනය කරන පිවිතුරු හෙළ උරුමය පක්ෂයේ නායක නීතීඥ උදය ගම්මන්පිල මහතාගෙන් කළ කරුණු විමසීමකදී ඔහු පැවසුවේ මෙවැනි විවාදයක් පැවැත්වීම කාලීන අවශ්‍යතාවක් බවයි.

මේ සම්බන්ධයෙන් ඒකාබද්ධ විපක්ෂයේ අනෙකුත් නායකයන් සමඟ ද සාකච්ඡා කර ඇති බව ගම්මන්පිල මහතා සඳහන් කළේය.

පොලිසියට එරෙහිව ප්‍රබල චෝදනා රැසක් එල්ල වී පවතින මොහොතක ඒ ගැන මැතිසබයේ කතාබහ කිරීම ඉතා වැදගත් බව ජනතා විමුක්ති පෙරමුණේ නායක අනුර කුමාර දිසානායක මහතා අප සමඟ කීය.

පොලිස්පතිවරයාගේ ක්‍රියාකලාපය ගැන පසුගිය මැතිසභා රැස්වීමකදී තමා ප්‍රශ්නයක් මතු කළ බවද ජනතා විමුක්ති පෙරමුණේ නායකයා පැවසීය.