(ඩයනා උදයංගනී)

දිවයිනේ ප‍්‍රදේශ රැසකට බලපා ඇති තද වැසි සහ සුළං සහිත කාලගුණ තත්ත්වය හේතුවෙන් ඉකුත් දින කිහිපය තුළ නව දෙනෙකු මියගොස් අයෙකු අතුරුදන් වී ඇති අතර පවුල් 12,478කට අයත් පුද්ගලයින් 48,918 දෙනෙකු පීඩාවට පත්ව ඇතැයි ආපදා කළමනාකරණ මධ්‍යස්ථානය පවසයි.

ඔවුන් අතුරින් පවුල් 1,348කට අයත් 5,834 ක පිරිසක් ආරක්‍ෂිත ස්ථාන 21ක රඳවා සිටින බව ආපදා කළමනාකරණ මධ්‍යස්ථානයේ සහකාර අධ්‍යක්‍ෂ (මාධ්‍ය) ප‍්‍රදීප් කොඩිප්පිලි මහතා පැවසීය.

මිය ගිය පුද්ගලයින් අතුරින් හය දෙනෙක්ම මියගොස් ඇත්තේ දියේ ගිලීම් හේතුවෙනි.

දිවයිනේ දිස්ත‍්‍රික්ක ගණනාවකට බලපෑ තද වැසි හා සුළං හේතුවෙන් ඇති වූ ගං වතුර ,  පස් කඳු කඩාවැටීම් හා ගස් කඩාවැටීම් හේතුවෙන් මෙම පීඩාව ඇති වී තිබේ.

මෙහි වැඩිම බලපෑමක් එල්ල වී ඇත්තේ කළුතර, ගාල්ල සහ කොළඹ දිස්ත‍්‍රික්කයන්ට බව ද කොඩිප්පිලි මහතා පැවසීය.

සිදුවූ අනතුරුවලින් තුවාල ලැබූ 19 දෙනෙකු රෝහල්ගත කර සිටින බව ද ඔහු සඳහන් කළේය.

කළුතර දිස්ත‍්‍රික්කයේ පවුල් 4,510 කට අයත් 17,945 දෙනෙක් ,  ගාල්ල දිස්ත‍්‍රික්කයේ පවුල් 2,636 කට අයත් 9,987 දෙනෙක්  සහ කොළඹ දිස්ත‍්‍රික්කයේ පවුල් 4,069කට අයත් 16,520 දෙනෙක් මෙසේ පීඩාවට පත්ව සිටිති.

මීට අමතරව තද සුළං සහ පස් කඳු කඩා වැටීම හේතුවෙන් ප‍්‍රදේශ රැසක නිවාසවලට හානි සිදුව තිබේ.

මෙම තද වැසි ,  සුළං හා ජලගැලීම් හේතුවෙන් නිවාස 35ක් සම්පූර්ණයෙන් විනාශ වී ඇති අතර තවත් නිවාස 1,668 කට අර්ධ හානි සිදුව ඇති බව ද එම ආපදා කළමනාකරණ මධ්‍යස්ථානය සඳහන් කරයි.

මෙම හානි තක්සේරු කර වන්දි ගෙවන තුරු මූලික පියවර ලෙස රුපියල් 10,000 බැගින් ලබාදීමට ජාතික රක්‍ෂණ භාර අරමුදල යටතේ පියවර ගෙන තිබෙන බව ද කොඩිප්පිලි මහතා ප‍්‍රකාශ කළේය.

කුඩා හා මධ්‍ය පරිමාණ ව්‍යාපාරික ස්ථාන 239 කට ද අර්ධ හානි සිදුව තිබේ.

ඇති වූ ගංවතුර හා පස් කඳු කඩා වැටීම හේතුවෙන් ගමනාගමන කටයුතුවලට ද බාධා සිදුව තිබේ.