එල්.ටී.ටී.ඊ සංවිධානයේ නායක වේළුපිල්ලේ ප්‍රභාකරන් ඇතුළු යුද්ධයෙන් මියගිය කොටි සාමාජිකයින්  සිහිකරමින් මහවිරු සැමරුම් 50කට අධික සංඛ්‍යාවක් මෙවරද උතුරේ සංවිධානය වී තිබෙන බව උතුරේ ආරක්ෂක අංශ අවධාරණය කරයි.

උතුරේ දෙමළ දේශපාලඥයින්ගේ සහ සිවිල් සංවිධාන මූලිකත්වයෙන්  21 වනදා සිට ලබන 27 වනදා තෙක් ඇති  මහවිරු සතිය පුරාම මෙම  සැමරුම් සංවිධානය කර ඇති අතර යාපනයේ පමණක් සැමරුම් 20කට අධික සංඛ්‍යාවක් සංවිධානය කර තිබෙන බවද  එම ආරංචිමාර්ග පෙන්වා දෙයි.

මෙවරද ප්‍රධානතම මහවිරු සැමරුම් මියගිය කොටි සාමාජිකයින් 7000ක් පමණ මිහිදන් කර ඇති කිලිනොච්චිය කනකපුරම් සුසාන භූමියේදී ලබන (27) වනදා සවස සිදුකිරීමට නියමිතව ඇත්තේ  දෙමළ ජාතික සන්ධාන යාපන දිස්ත්‍රීක් පාර්ලිමේන්තු මන්ත්‍රීවරයෙකුගේ මූලිකත්වයෙනි.

මේ ආකාරයෙන් ලබන 27 වනදා යාපනය විශ්ව විද්‍යාලය,කයිඩස්  සාටි වෙරළේ පිහිටි එල්.ටී.ටී.ඊ සුසාන භූමිය, කෝපායි,හි පිහිටි යුද හමුදා 51වන සේනාංකය ඉදිරිපිට, වේළුපිල්ලේ ප්‍රභාකරන් උපන් වැල්වැටිතුරෙයි නිවස ආදී ස්ථාන   කේන්ද්‍රගතව මහවිරු සැමරුම් සංවිධානය වී ඇති අතර ඇතැම් ස්ථානවල එල්.ටී.ටී.ඊ නායක වේළුපිල්ලේ ප්‍රභාකරන්ගේ උපත යෙදෙන (26) දින උපන්දින සැමරුම් ද සංවිධානය වී ඇතැයි ද පැවසේ.