අජන්ත කුමාර අගලකඩ
 
උතුරු පළාත් මහ ඇමැති සී.වි. විග්නේෂ්වරන්  මහතාට තීරු බදු රහිතව වාහනයක් ආනයනය කිරිම සඳහා බලපත්‍රයක් නිකුත් කිරිමට ඉදිරිපත් කළ යෝජනාවක් කැබිනට් මණ්ඩලය විසින් අද (2) ප්‍රතිකේෂ්ප කරනු ලැබීය.

ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් ජනාධිපති කාර්යාලයේ අද (2) දහවල් පැවති කැබිනට් රැස්වීමේ දී අදාළ යෝජනාව පළාත් පාලන හා පළාත් සභා ඇමැති ෆයිසර් මුස්තාපා මහතා විසින් ඉදිරිපත් කර තිබු බවද වාර්තා විය.

උතුරු පළාත් මහ ඇමැති විග්නේෂ්වරන් මහතාට ඇමෙරිකා ඩොලර් 60,000 ක වාහනයක් තීරු බදු රහිතව ආනයනය කිරිම සඳහා බලපත්‍රයක් නිකුත් කිරිමට මෙම යෝජනාව ඉදිරිපත් කර තිබිණි.

මැති ඇමැතිවරුන්ට නිකුත් කරන වාහන බලපත්‍ර වසරකට අත්හිටුවා තිබෙන බැවින් සහ උතුරු පළාත් සභාවේ නිල කාලය තවත් දින කිහිපයකින් අවසන් විමට නියමිතව ඇති බැවින් මෙම යෝජනාවට කිසිසේත් එකඟවිය නොහැකි බව ඇමැතිවරුන් කිහිපදෙනකු එහිදී ප්‍රකාශ කර ඇතැයි දැනගන්නට තිබේ.

ඇමැතිවරුන්ගේ විරෝධය හමුවේ යෝජනා කැබිනට් මණ්ඩලයෙන් ප්‍රතික්ෂේප වු බවද වාර්තාවේ.