තරිඳු ජයවර්ධන
 
දියතලාවේදී බස් රථයක අත්බෝම්බයක් පිපිරීමෙන් පසු ඇති වූ ගින්නෙන් 18 දෙනකු තුවාල වීම සම්බන්ධයෙන් කළ විමර්ශනවලින් පසු එම බෝම්බය රැගෙන ආ බව කියන යුද හමුදා සාමජිකයා අද (2) අත්අඩංගුවට ගනු ලැබීය.
 
ජානක චන්ද්‍රසේන නම් එම බලය ලත් නිලධාරියා ලබන 16 වැනි දා තෙක් රිමාන්ඩ් කරන ලෙස බණ්ඩාරවෙල මහේස්ත්‍රාත් අධිකරණය නියෝග කළේය.
 
සැකකාර යුද හමුදා සාමාජිකයා හය වැනි ශ්‍රී ලංකා විදුලි හා යාන්ත්‍රික ඉන්ජිනේරු බළකායේ මනිලන්ද කඳවුරට අනියුක්තව සේවය කරන බව පොලිස් මාධ්‍ය ප්‍රකාශක පොලිස් අධිකාරී රුවන් ගුණසේකර මහතා පැවසීය.

ණය බරින් මිරිකී සිටි ඔහු එම අත්බෝම්බය නිවසේ සිට රැගෙන ආ බව මූලික විමර්ශනවලදී අනාවරණය වීයැයි පොලිසිය පවසයි. මෙය ත්‍රස්ත ක්‍රියාවක් බව විවිධ පිරිස් මුලින් චෝදනා කළහ. ඔහු සමග පැමිණි යුද හමුදා සාමජිකයන්ද පොලිසියට ප්‍රකාශ දෙමින් කියා ඇත්තේ අත්බෝම්බය තිබුණේ සැකකරුගේ ගමන්මල්ලේ බවයි.

බණ්ඩාරවෙල කොට්ඨාස භාර පොලිස් අධිකාරී සුදත් මාසිංහ මහතාගේ මෙහෙයවීමෙක් විමර්ශන සිදු විය.