තිළිණි ද සිල්වා

කැනඩාවේදී සිය භාර්යාව  ඝාතනය කිරීමේ සිද්ධියකට වරදකරුවූ ශ්‍රී ලාංකිකයකු එරටින් වහා පිටුවහල් කිරීමට කැනඩා රජය පියවර ගෙන  ඇතැයි රේඩියෝ කැනඩා පුවත් සේවය  පවසයි.

මෙලෙස එරටින් පිටුවහල් කරනු ලැබ ඇත්තේ සිවලෝගනාදන් තනබාලසිංහම් නැමැත්තෙකි.

2012 වසරේදී අගොස්තු මාසයේදී කැනඩාවේ මොන්ටි‍්‍රයල් නුවර පිහිටි ඔවුන්ගේ නිවසේදී සිය බිරිඳ වූ අනූජා බාස්කරන් නැමැත්තිය ඝාතනය කිරීමේ වරදට චූදිත ලාංකිකයා එරටින් පිටුවහල් කිරීමට කැනඩා ආගමන හා සරණාගත කවුන්සිලය තීන්දු කර තිබූ අතර එම පිටුවහල් කිරීමේ තීන්දුවට එරෙහිව ඔහු විසින් ගොනු කළ අභියාචන පෙත්සමක් ගොනු කිරීමත් සමඟ එම තීන්දුව තාවකාලිකව අත්හිටුවනු ලැබිණි.

තමන්ගේ පවුලේ අය සියලූ දෙනාම කැනඩාවේ ජීවත්වන හෙයින් එලෙස පිටුවහල් කිරීම නීතිවිරෝධී බව චූදිත ලාංකිකයා සිය අභියාචන පෙත්සමින් පෙන්වා දී තිබිණි.

පසුගිය හය වසරකට වැඩි කාලයක් පුරා පැවති එම අභියාචන පෙත්සමේ විභාගය ඉකුත් 06 වැනිදා  අවසන් කරමින් චූදිත ලාංකිකයාගේ අභියාචනය ඉවත දමමින් ඔහු ව වහා ක‍්‍රියාත්මක වන පරිදි කැනඩාවෙන් පිටුවහල් කිරීමට තීන්දු කර ඇත.

ඒ අනුව ඔහු මේ සතිය ඇතුළත කැනඩාවෙන් මෙරටට පිටුවහල් කෙරෙනු ඇතැයි ද පැවසේ.