(විනීතා එම් ගමගේ)
 
බන්ධනාගාරගතව සිරදඩුවම් විදින්නන්ට වෘත්තිය පුහුණුව ලබා දී ඉදිකිරීම් සේවාවන්හි සේවයේ යෙදවීමට බන්ධනාගාර දෙපාර්තමේන්තුව පියවර ගෙන ඇත.
 
එහි පළමු පියවර සේ වසර හතකට අඩු සිර දඩුවම් විදින රැදවූවන් 500 දෙනෙක්  මහා පරිමාණ ඉදිකිරීම් සමාගම්වල සේවයේ යෙදවීමට පියවර ගන්නා බව බන්ධනාගාර කොමසාරිස් (පුනරුත්තාපන හා නිපුණතා සංවර්ධන) චන්දන ඒකනායක මහතා ලංකාදීපයට ඊයේ (25) පැවසීය.
 
මේ වැඩපිළිවෙලට මේ වනවිට කැබිනට් අනුමැතිය ලැබී ඇති බවත්  මේ වනවිටත් එම සිරකරුවන්ට වෘත්තිය පුහුණුව මෙන්ම මානසික තත්ත්වය ඉහළ දැමීමේ පුහුණුවක් ලබා දුන් බව ඒකනායක මහතා පැවැසීය.

පවතින ශ‍්‍රම හිඟයට පිළිතුරක් ලෙස මෙම වැඩපිළිවෙල ආරම්භ කළ බව කී කොමසාරිස්වරයා එහි සම්බන්ධීකරණය හා පහසුකම් සැපයීම ඇවන්ගාඞ් සමාගම විසින් කරන බව ද කීය.
 
මෙම පිරිස සේවය කරන අතරතුර ඔවුන්ගේ සේවා මට්ටම් පරික්ෂාවකින් පසු ශ්‍රී ලංකා වෘත්තිය පුහුණු අධිකාරිය සේවා සහතිකයක්  ලබාදීමට නියමිත බවත් හෙතෙම කියා සිටියේය.
 
ඉදිරියේ දී තවත් සිරකරුවන් මෙම වැඩපිළිවෙලට එක්කර ගන්නා බව පැවසූ ඒකනායක මහතා මොවුන් ගේ ද`ඩුවම් කාලය අවසන් වීමෙන් පසු විදේශ රැකියා සදහා යාමේ අවස්ථාව සකස් කර දීමට රජය මැදිහත්වන බව ද සදහන් කළේය.
 
මෙම වැඩපිළිවෙලේම කොටසක් ලෙස වරාය අධිකාරියට අවශ්‍ය බේකරි නිෂ්පාදන සැපයීමේ ගිවිසුමකට ඉදිරි සතියේ දී එළඹෙන බව ද හෙතෙම කියා සිටියේය.