(ඉන්දිකා රාමනායක)
 

හිටපු අමාත්‍ය  පාඨලී  චම්පික රණවක මහතා  අත්අඩංගුවට ගැනීමේ දී  පොලිසිය අනුගමනය කළ යුතු  කි‍්‍රයා පිළිවෙත අනුගමනය කර  ඇතිද යන්න  පොලිස් කොමිසම  වැඩබලන පොලිස්පතිවරයාගෙන් අද (23)  වාර්තාවක් කැදවන බව ජාතික පොලිස් කොමිසම කියයි.
 
හිටපු අමාත්‍යවරයා අත්අඩංගුවට ගැනීමේදී නියමිත  ක‍්‍රමයට  සිදු වී නොමැති බවත් ඒ සම්බන්ධයෙන් පියවර ගන්නැයි නියෝජ්‍ය කථානායක  ආනන්ද කුමාරසිරි  මහතා පොලිස් කොමිසමේ සභාපතිවරයා වෙත ලිපියක් යොමුකර ඇති  බවත් ඒ අනුව පොලිස්පතිවරයාගෙන් සිද්ධිය සම්බන්ධයෙන්  වාර්තාව කැදවන බව  ජාතික පොලිස් කොමිසමේ ලේකම් නිශාන්ත වීරසිංහ  මහතා ලංකාදීපයට පැවසීය.
 
නියෝජ්‍ය කතානායකවරයා මෙම ලිපිය  ඉකුත් (19) දින ජාතික පොලිස් කොමිසමේ සභාපතිවරයා වෙත යොමු කර ඇති බවද ලේකම්වරයා කියා සිටියේය.
 
පාර්ලිමේන්තු  මන්තී‍්‍රවරයකු  යම්  නිශ්චිත  කාරණයක් සදහා  අත්අඩංගුවට  ගැනීමට  කටයුතු කරන්නේනම්  මෙතෙක් පැවති  සම්ප‍්‍රදාය වුයේ  කථානායකවරයා දැනුවත් කර එසේ කිරීමයි.      පාඨලී චම්පික  මන්ති‍්‍රවරයා අත්අඩංගුවට ගැනීමේ දී  ඒ සදහා   සහභාගි වු  කොළඹ අපරාධ කොට්ඨාසයේ අධ්‍යක්වරයා  ඇතුලූ පොලිස් කණ්ඩායම  අදාල මන්ති‍්‍රවරයාගේ නිවසට ගොස්  පාර්ලිමේන්තුව දැනුවත් කර ඇත්තේ දැයි  විමසු අවස්ථාවේ එම නිවසින් පිටතට පැමිණ  ප.ව  6.57 ට  දුරකතනයෙන්  මා  අමතා  අත්අඩංගුවට  සිදු කළ බවට  දන්වන ලද බවද නියෝජ්‍ය කථානායකවරයාගේ ලිපියේ සඳහන් වේ.
 
මන්තී‍්‍රවරයකු  අත්අඩංගුවට ගැනීමේ දී   අනුගමන  කළ යුතු  කි‍්‍රයා  පිළිවෙත මෙම අවස්ථාවේ   සිදුව නොමැති බවට  තමන් විශ්වාස කරන බවත්  ඒ සම්බන්ධයෙන් අවදානය යොමු කර නිසි පියවර ගන්නා ලෙසට නියෝජ්‍ය කතා නායකවරයා සිය ලිපියෙව් වැඩිදුරත් දන්වා ඇති බවද  කොම්සම් ආරංචි මාර්ග පවසයි.