(ජයන්ත සමරකෝන්)

නවක වද සිද්ධීන් හේතුවෙන් මේ වනවිට 2000කට අධික සිසු සිසුවියන් පිරිසක් විශ්වවිද්‍යාලය හැරගොස් ඇතැයි ද ලිංගික හිංසනය හා ප්‍රචණ්ඩත්වය ඉවසාගත නොහැකිව 14 දෙනකු සියදිවි හානිකර ගෙන ඇතැයි ද උසස් අධ්‍යාපන  හා සංස්කෘතික කටයුතු අමාත්‍ය ආචාර්ය විජයදාස රාජපක්‍ෂ මහතා පෙරේදා (30) පැවැසීය.

හිටපු අධ්‍යාපන ඇමැතිවරයකු වූ රිචඞ් පතිරණ මහතා 1998 වසරේ දී ගෙනා නවකවද පනත යටතේ, මෙම සිද්ධීන්වලට සම්බන්ධ සිසු සිසුවියන් 46 දෙනකු මේ වනවිට ඇප නැතිව හිරේ ලැග ඇති බව ද අමාත්‍යවරයා කීය.

අද ඇතැම් විශ්වවිද්‍යාල පාලනය කරන්නේ උපකුලපතිවරුන් හෝ ආචාර්යවරුන් නොව, ශිෂ්‍ය පාතාලය බව ද මෙය ඉතා ඛේදජනක තත්ත්වයක් බව ද අමාත්‍යවරයා සඳහන් කළේය.

නවක සිසුවියන්ට යට ඇඳුම් තහනම් කරන ලද විශ්වවිද්‍යාල ඇති ලෝකයේ එකම රට ශ්‍රී ලංකාව බව ද ඔහු කීවේය.

මහරගම ජාතික තරුණ සේවා සභාවේ පෙරේදා (30) පැවැති මහරගම, බොරලැස්ගමුව හා පිළියන්දල වැඩිහිටි මහ ලේකම් කාර්යාල සංවිධානය කළ වැඩිහිටි දින සැමරුම් උළෙලට සහභාගිවෙමින් අමාත්‍යවරයා මේ බව සඳහන් කළේය.