(ඩයනා උදයංගනී)
පෙර වසරවලට සාපේක්‍ෂව මෙවර නිදහස් දින සැමරුම් ජාතික උළෙලේ වියදම් අඩු කර ඇතැයි රාජ්‍ය කළමනාකරණ හා ගිණුම් කටයුතු පිළිබඳ රාජ්‍ය අමාත්‍ය ලසන්ත අලගියවන්න මහතා ලංකාදීපයට අද(3) පැවසීය.
 
ජනාධිපතිවරයාගේ උපදෙස් පරිදි එම පියවර ගෙන ඇතැයි ද රාජ්‍ය අමාත්‍යවරයා සඳහන් කළේය. ගෝඨාභය රාජපක්‍ෂ මහතා ජනාධිපතිධූරයට පත්වීමෙන් අනතුරුව පවත්වන ප‍්‍රථම නිදහස් දින සැමරුම ද මෙය වේ.
 
මෙවර නිදහස් දින ත‍්‍රිවිධ හමුදා ආචාර පෙළපාලියේ කාලය ද පෙර වසරවලට සාපේක්‍ෂව පැයකින් පමණ අඩු කර ඇති බව වාර්තා වේ.
 
මීට පෙර වසරවලදී දිස්ත‍්‍රික් හා ප‍්‍රාදේශීය ලේකම් කොට්ඨාශ මට්ටමින් පැවැත්වූ නිදහස් දින සැමරුම් උත්සව මෙවර නොපැවැත්වෙන බව ද රාජ්‍ය ඇමතිවරයා කීවේය.
 
එම උත්සව වෙනුවට දිස්ත‍්‍රික්ක, ප‍්‍රදේශීය ලේකම් කොට්ඨාශ, ග‍්‍රාම නිලධාරී කොට්ඨාස මට්ටමින් හා ආයතන මට්ටමින් රුක් රෝපණ වැඩසටහන් සංවිධානය කරන ලෙස අදාළ අංශ වෙත උපදෙස් දී තිබෙන බව ද ලසන්ත අලගියවන්න මහතා ස`දහන් කළේය.
 
මෙවර නිදහස් දින සැමරුම 2008 වසරෙන් පසු යළිත් නිදහස් චතුරස‍්‍රයේදී පැවැත්වීමේ ප‍්‍රධාන අරමුණ වන්නේ ජනතාවට සිදුවන හිරිහැර අඩුකිරීම බවද රාජ්‍ය අමාත්‍යවරයා පැවසීය.
 
මීට පෙර වසරවල නිදහස් දින සැමරුම් උළෙලේ පෙරහුරු ආදිය සදහා ගාලූ මුවදොර පිටිය ඉදිරිපිටින් මාර්ගය වසා තැබීම නිසා ජනතාව දැඩි පීඩාවකට පත්වූ බව ද හෙතෙම කීවේය.
 
මෙවර උත්සවය සදහා මැති ඇමතිවරුන්, විදේශ තානාපතිවරුන්, රාජ්‍ය නිලධාරීන් ඇතුළු ආරාධිතයින් 2,500කට පමණ ආරාධනා කර තිබෙන බව කී අලගියවන්න මහතා සාමාන්‍ය ජනතාව 1000 කට පමණ නිදහස් චතුරඝ්‍රය අසල ක‍්‍රීඩා පිටියේ සිට එය නැරඹීමේ පහසුකම් සපයා තිබෙන බවද ප‍්‍රකාශ කළේය.