(නිමන්ති රණසිංහ)
 
කොළඹ ප‍්‍රධාන මහේස්ත‍්‍රාත් අධිකරණයේ නඩු භාණ්ඩ කාමරයේ තිබූ පවතින නඩුවකට අදාළ නඩු භාණ්ඩ වූ රන් ආභරණ අතුරුදන් වීමේ සිද්ධියක් සම්බන්ධයෙන් එහි සේප්පුවලට කොළඹ අතිරේක මහේස්ත‍්‍රාත් බුද්ධික ශ්‍රී රාගල මහතා අද(15) මුද්‍රා තබනු ලැබීය.
 
හේස්ත‍්‍රාත්වරයා විසින් අද (15) පෙරවරුවේදී මෙලෙස මුද්‍රා තබනු ලැබුවේ කොළඹ ප‍්‍රධාන මහේස්ත‍්‍රාත් අධිකරණයේ දෙවැනි නඩු භාණ්ඩ කාමරයේ තිබූ සේප්පුව සහ තවත් කබඩ් කිහිපයකි.
 
අධිකරණය විසින් අදාළ නඩු භාණ්ඩ කාරමයේ තිබූ සේප්පුව සහ කබඩ් කිහිපය සීල් තැබීමෙන් අනතුරුව එහි වැඩිදුර විමර්ශනය සදහා අපරාධ පරීක්ෂණ දෙපාර්තමේන්තුව වෙත සිද්ධිය භාරදී ඇත.
 
නිවසක් බිද රුපියල් පන්ලක්ෂ විසි එක්දහසක් වටිනා දේපල සොරකම් කිරීමේ සිද්ධියක් සම්බන්ධයෙන් ග‍්‍රෑන්ඞ්පාස් පොලීසිය මගින් ඉකුත් මැයි මස 05 වැනිදා අධිකරණය වෙත වාර්තා කරන ලද බී-73270/4/17 නඩුවට අදාළව පී ආර් 2153/2017 දරන නඩුභාණ්ඩය එම නඩු භාණ්ඩ කාමරයෙන් මෙලෙස අතුරුදන්ව ඇතැයි වාර්තා වෙයි.
 
අදාළ නඩු භාණ්ඩය ග‍්‍රෑන්ඞ්පාස් පොලිසිය විසින් ඉකුත් ජුනි මස 12 වැනිදා පී ආර් 2153/2017 දරන අංකය යටතේ කොළඹ ප‍්‍රධාන මහේස්ත‍්‍රාත් අධිකරණයේ දෙවැනි නඩු භාණ්ඩ කාමරය වෙත භාරදී ඇතැයි ද අනාවරණය වෙයි.