( බිමල් ශ්‍යාමන් ජයසිංහ )

පයාගල මග්ගොන තුඩාව වෙරළින් ධීවර කටයුතු සදහා ගොස් නැවත පැමිණෙමින් සිටි පුද්ගලයින් තිදෙනකුගෙන් යුත් බෝට්ටුවක් අද (18)  දහවල් පෙරැළි යාමෙන්  දෙදෙනෙක් මිය ගොස් එක් අයෙක් රෝහල් ගත කර ඇතැයි පයාගල පොලිසිය කියයි .

අනතුරෙන් මියගොස් ඇත්තේ මග්ගොන තුඩාව පාර පදිංචව සිටි ඇන්ටන් ප්‍රසන්න ප්‍රනාන්දු (53) හා මග්ගොන පැලවත්ත පදිංචි සිටි නිරෝශන් ජයසූරිය (43 ) දෙදෙනායි.

බෝට්ටුවේ හිමිකරු වන ඇන්ටන් බැස්ටින් ප්‍රියන්ත(49) නාගොඩ රෝහලේ ප්‍රතිකාර ලබන බව පොලිසිය සදහන් කරයි .

මියගිය දෙදෙනා  රෝහල් ගත කරන සිටින බෝට්ටුවේ හිමිකරු සමග අද උදේ 7.30 ට පමණ මුහුදු ගොස් දහවල් 12.30 පමණ  නැවත ගොඩබිමට පැමිණෙමින් සිටියදී  ගොඩබිමට පේන තෙක් මානයේදී එකවරම බෝට්ටුව හමා ආ වේගවත් සුළගත් සමග විශාල දිය වැලකට අසුව පෙරලීමෙන් මෙම අනතුරුව සිදු වී ඇති බව පොලිසිය සදහන් කරයි .

එම අනතුර දුටු තවත් ධීවර බෝට්ටුවක පිරිසක් වහා එම ස්ථානයට පැමිණ දෙදෙනෙකු දැඩි ආයාසයක් දරා බේරාගෙන ගොඩබිමට ගෙන එන විටත් එයින් එක් අයෙකු මියගොස්ව සිට ඇතැයි පොලිස් නිලධාරියෙක් පැවසීය .

එහි සිටි අනෙක් පුද්ගලයා වන බෝට්ටුවේ හිමිකරු  වහා නාගොඩ රෝහලට රැගෙන යාමට කටයුතු කර ඇතැයි පොලිසිය කියයි .

එම බෝට්ටුවේ ගමන් ගත් අනෙක් පුද්ගලයා බෝට්ටුව පෙරලීමත් සමග අතුරුදහන් වී ඇති අතර පැයකට පමණ පසු ඔහුගේ මළසිරුර  එම බෝට්ටුවේ තිබූ දැල් වලට පැටලී තිබී සොයා ගැනීමට හැකි වී ඇතැයි පොලිස් නිලධාරීයා වැඩිදුරටත් පැවසීය .

අනතුරින් බෝට්ටුවට දැඩි අලාභහානි වී ඇති අතර එහි එංජිම දියබට වැටී සොයා ගැනීමට නොහැකි වී ඇතැයි පොලිසිය කියයි .

මියගිය පුද්ගලයන් දෙදෙනාගේ පශ්චාත් මරණ  පරීක්ෂණය කලුතර  මහා රෝහලේදී සිදු කිරීමට නියමිතය.