(විනීතා එම් ගමගේ)
            
කුඩා තේ වතු හිමියන්ට දළු නෙලීමේ යන්ත‍්‍ර හඳුන්වා දීමට කටයුතු කර ඇතැයි කුඩා තේ වතු සංවර්ධන අධිකාරිය පවසයි. 

මේ සඳහා ජපානයේ ජෙබෙක් බැංකුව වෙතින් ඩොලර් මිලියන 175 ක ණයක් ලැබෙන බව කුඩා තේ වතු සංවර්ධන අධිකාරියේ සභාපති විජේරත්න දේවගෙදර මහතා පැවැසීය. 

මේ වන විටත් දළු නෙලීමේ යන්ත‍්‍ර නිපදවා ඇති බවත් තවමත් එය තේවතු හිමියන් අතරට ගොස් නැති  බවත් හෙතෙම සඳහන් කළේය. 

තේ වතු හිමියන් මේ යන්ත්‍රය පිළිබඳ දක්වන උනන්දුව ඉතාමත් අඩු බව කී සභාපතිවරයා ඊට හේතුව ලෙස හෙළි කර ගත හැකි වූයේ එම යන්ත‍්‍ර මගින් මසකට වරක් පමණක දළු නෙළිය හැකි වීම බව යැයි ද කීය.

සාමාන්‍යයෙන් සතියට වරක්  බැගින් මසකට සිව් වතාවක් අතින් දළු නෙළිය හැකි වුවත් යන්ත‍්‍රයෙන් කපා ගෙන යාමේ දී දළු ඇදෙන්නේ මසකට වතාවක් පමණක් බව ද සභාපතිවරයා පෙන්වා දුන්නේය.

සභාපතිවරයා මේ අදහස් පළ කළේ කුඩා තේ වතු සංවර්ධන අධිකාරියේ අද (6) පැවැති මාධ්‍ය හමුවක් අමතමිනි.